狮子王往北海道旅行不知多少次，去年竟在富良野地区买下一小块农地，留作他日作耕种用途。狮子王正当盛年，在港从事投资，屡有斩获，何来时间往北海道「采菊东篱下」？狮子王对左丁山说：「趁便宜，买定先啫！横掂摆钱在银行冇息收，买幅地嘅机会成本微不足道。」在香港新界买幅农地，或者日后会升值，无端端赚一大笔，但在日本就几难咯。东瀛游董事禤国全对左丁山讲过：「喺日本买楼，会年年减值㗎，作投资用途根本无利可言。我地在大阪冲绳买地起酒店，作东瀛游旅行团团员入住之用，又唔同讲法，有cashflow吖嘛。」
不过狮子王唔计较呢啲咯。因佢好好人，代左丁山在富良野买咗两套薰衣草枕头回港，买完又唔肯收钱，於是请佢食饭，佢话要食意大利菜，於是听曾智华介绍，去咗海运大厦新翼（Ocean Terninal Extension）三楼一间开张冇几耐嘅Paper Moon吃午餐，以前湾仔修顿斜对面有间Paper Moon，系食广东菜嘅，好似系与Kelly Brown、 Classified属同一集团，现在已经冇咗。呢间OTE嘅Paper Moon又系何方神圣呢？据经理讲，属1957餐饮集团（按：11月23日有报纸广告，1957& Co（Hospitality）招股）。
呢间餐厅胜在环境一流，坐在窗边可以望到由铜锣湾柏景台至西环尾嘅维港全景，赏心悦目之至，食物水准亦相当好，只系价钱比同类嘅意大利餐厅贵一两成，但既有无敌海景，也算合理。我地系咁点菜，吃得过瘾，但系埋单嗰阵，与狮子王同来之老友R，竟然首先抢埋单争俾钱，究竟食咗几多，已无印象，狮子王哈哈笑，「丁山哥，你欠我一餐，今日唔算！」咁就要等到2018年咯，因为年尾大家多约会，要三个同日中午得闲，唔系咁易。老友R在地产界百足咁多爪，知道好大单交易内幕，听佢讲古仔，如在现场身历声，十分过瘾！不过单世纪大刁还未交易完成，都系无谓讲住，以免阻人发达。不过地产R话寿臣山超级豪宅亦有劏房出租，则令左丁山觉得有啲意外，佢话：「其实月租十几万嘅豪宅系好难搵到租客嘅，一啲富二代或富三代得到遗产，为免得物无所用，索性劏房租俾单身外国人，竟然系一条财路！」
App下载
