地產博客 > 絲絲細語 返回
瀏覽人次:15854    回應:2
絲絲細語

海景餐廳

 

左丁山

2017年11月28日

  獅子王往北海道旅行不知多少次,去年竟在富良野地區買下一小塊農地,留作他日作耕種用途。獅子王正當盛年,在港從事投資,屢有斬獲,何來時間往北海道「採菊東籬下」?獅子王對左丁山說:「趁便宜,買定先啫!橫掂擺錢在銀行冇息收,買幅地嘅機會成本微不足道。」在香港新界買幅農地,或者日後會升值,無端端賺一大筆,但在日本就幾難咯。東瀛遊董事禤國全對左丁山講過:「喺日本買樓,會年年減值㗎,作投資用途根本無利可言。我地在大阪沖繩買地起酒店,作東瀛遊旅行團團員入住之用,又唔同講法,有cashflow吖嘛。」

  不過獅子王唔計較呢啲咯。因佢好好人,代左丁山在富良野買咗兩套薰衣草枕頭回港,買完又唔肯收錢,於是請佢食飯,佢話要食意大利菜,於是聽曾智華介紹,去咗海運大廈新翼(Ocean Terninal Extension)三樓一間開張冇幾耐嘅Paper Moon吃午餐,以前灣仔修頓斜對面有間Paper Moon,係食廣東菜嘅,好似係與Kelly Brown、 Classified屬同一集團,現在已經冇咗。呢間OTE嘅Paper Moon又係何方神聖呢?據經理講,屬1957餐飲集團(按:11月23日有報紙廣告,1957& Co(Hospitality)招股)。呢間餐廳勝在環境一流,坐在窗邊可以望到由銅鑼灣柏景台至西環尾嘅維港全景,賞心悅目之至,食物水準亦相當好,只係價錢比同類嘅意大利餐廳貴一兩成,但既有無敵海景,也算合理。我地係咁點菜,吃得過癮,但係埋單嗰陣,與獅子王同來之老友R,竟然首先搶埋單爭俾錢,究竟食咗幾多,已無印象,獅子王哈哈笑,「丁山哥,你欠我一餐,今日唔算!」咁就要等到2018年咯,因為年尾大家多約會,要三個同日中午得閒,唔係咁易。老友R在地產界百足咁多爪,知道好大單交易內幕,聽佢講古仔,如在現場身歷聲,十分過癮!不過單世紀大刁還未交易完成,都係無謂講住,以免阻人發達。不過地產R話壽臣山超級豪宅亦有劏房出租,則令左丁山覺得有啲意外,佢話:「其實月租十幾萬嘅豪宅係好難搵到租客嘅,一啲富二代或富三代得到遺產,為免得物無所用,索性劏房租俾單身外國人,竟然係一條財路!」

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. Hin hing 2017-11-28 15:55:43
富戶錢多嫌礙眼,貧家糧缺點偷生?
2. Jengun 2017-11-28 16:10:23
貧家缺糧要偷生?唯有執垃圾,捱麵包喇!