禤国全话佢以前买楼，首期一成，按揭九成，造就咗佢积累财富，呢个方法自97金融风暴之后，已经行唔通，现在无谓仿效。供楼虽然难咗，但楼价升得更加快，系乜现象呢？经济解释就系香港人有钱，外来资金庞大，两者合流，就将向来供应不足嘅香港楼市推上一个高峰又一个高峰。
外来人有大钱，专买豪宅，最近在星巴克就听到隔篱枱讲：「喂，某某市长嘅朋友来港用七亿几买咗一间house，预备落嚟长住喎。」讲得唔知几轻松，以前听一位潮州大富豪讲过：「赚一亿系好难㗎！」点知佢啲后辈只当三几亿系零用钱，言必十亿百亿，都唔知系乜嘢概念。前几日去上海总会食饭，一位退休潮州宾架对左丁山讲：「一万亿系乜嚟㗎，我都数唔清有几多个零，唔怪得我哋早退早着，以前见到一张一百万美元L/C，我要翻来覆去睇五六次先至肯确认呀！」点解讲到一万亿？原来有人话畀佢听，腾讯市值三万几亿，
佢吓咗一跳！按每股390元计算，腾讯市值系3万7千亿，折算美金约4743亿，与阿里巴巴嘅4772亿美元相距不远，同是世界级科网股。左丁山对退休宾架讲：「你哋潮州风水好，人杰地灵，香港新旧大富豪都系潮州人！」（按：马化腾住在石澳，已变为香港人。）
香港人不属此类富豪者，就专买纳米盘，上车盘，为下一代置业。左丁山以前话香港藏富於民，父母为儿女买楼，已成时尚。现在呢个观察已有调查证实，AIA做咗一个调查，发现45%父母指难免要为子女置业，约一半父母认为帮仔女买楼比自己退休更加重要，53%父母愿意做「加按」来为子女取得首期，资助金额平均90万元，最多一千万元，呢个调查证实香港父母系24孝敬子女嘅，好愿意为帮助子女买楼而牺牲自己退休金，此大概系梁振英政府推出辣招之前，完全冇人谂得到嘅，香港父母收埋咁多钱，对子女又咁伟大，将自己层楼加按借钱为下一代做首期，究竟呢样做法啱唔啱，有得拗！沙田陈太在大埔街市碰到校友W，佢就一於反对。校友W话：「喂，我唔系潮州姓马，退休金得来不易，我哋啲医疗保险费又贵，人老就要为自己打算，我叫两个仔女食自己㗎，供完佢哋读大学，仲要同佢哋供楼？我一於唔制！」此乃个人选择，子女的确不应以为父母提供首期系必然之事！
App下载
