发展商提供高成数按揭畀买家,两成首期就可以买楼,基本上只要你肯孭起条债,你就可以成为业主。呢啲情况系咪九七翻版?高成数按揭,楼市下跌好易变成负资产,仲唔推冧楼市?今年买新楼而选用发展商二按嘅业主的确系持货能力最低嘅人,佢哋揸干晒手上嘅现金,买一层自己负荷边缘嘅楼,希望时间能够站在佢哋嘅一边,带佢哋脱离负资产嘅边缘,亦令供楼负担按年减轻。佢哋唔系同发展商对赌,因为佢哋其实同发展商同坐一条船――如果楼市冧档,你估发展商收番层银主楼,仲可以卖到好价钱,仲可以追收差价?肯定系赚少咗,连同手上嘅存货都冧晒价。对赌嘅真正对手,系香港嘅地运,赌佢向上。只要香港唔冧,就算几年后自己捞唔掂,卖咗层楼都仲可以有番啲水脚。万一香港地运玩完,唔只楼市,全部一齐玩完,大把人陪葬,又有乜嘢所谓?记住,香港只有楼市嘅资产系保证永远值钱,唔会停牌变零,仲系唯一可以自用,除非你攞啲股票去贴墙纸。
唔够钱供楼变成银主盘,而家升市嘅时候都有出现,尤其是个别知名屋苑,几乎间间都要蚀让,唔系乜嘢秘密。但系呢类银主盘并无推冧楼市,一来数量唔多,二来而家系卖家市场,唔会因为其他蚀让盘而成为杀价藉口。但系发展商一手卖出嘅时候价钱mark得尽高,的确令到买家转售时毫无水位。而家买一手楼,要有心理准备,3年后松绑卖得,未必可以赚钱走人。而家买楼,要有住一世嘅准备,又或者当自己买车,出售嘅时候输折旧系理所当然。冇呢啲精神状态,买楼好大压力。
后悔60岁仍冇楼揸手
靠父干可以30岁未够就上车,倒不如话老豆搵个仔做人头,帮自己买多层楼。你话啲父母太过照顾子女,竟然出首期让个仔供楼?你试谂吓,如果唔出首期,个仔出去租屋住,签落成身卡数,到头来搞唔掂搵财仔,泥足深陷,最后又系边个执手尾?咪又系个老豆。与其迟早搵财仔,倒不如一开始就搵财仔借钱买楼,等个仔交租嘅钱变成供楼,至少有一半系可以袋番落袋嘅楼价。你话点解咁后生就做楼奴俾层500尺(而家可能只有200尺)绑住自己?你唔明白,唔系咁多人识得欣赏同利用自由。年轻人浪费了身边嘅自由而最后一事无成嘅,人数远多於识得争取自由为自己谋福利。耗尽了自由而发觉自己一事无成,感觉比当上20年楼奴更加悲惨。唔信?你觉得自己60岁嘅时候,会后悔一事无成多啲,还是冇层楼揸手多啲?应该系一事无成之余,仲系一层楼都冇。听落好似好无大志,唔谂啲惊天动地嘅功业,只系去谂点样供满层楼。但系你生存喺呢个时空嘅香港,见到林郑恍似权倾朝野但系冇能力搵一个合心水嘅班子,读咁多书只等待某日被人工智能取代,在自己出生嘅地方成为二等公民,你仲唔醒觉,原来供满一层楼系你唯一嘅生活保障, 对唔住,冇人帮到你。