地產博客 > 樓市散打王 返回
瀏覽人次:9577    回應:19
樓市散打王
原來供滿一層樓係你唯一嘅生活保障
 
方卓如
2017年6月4日 (信報)

發展商提供高成數按揭畀買家,兩成首期就可以買樓,基本上只要你肯孭起條債,你就可以成為業主。呢啲情況係咪九七翻版?高成數按揭,樓市下跌好易變成負資產,仲唔推冧樓市?今年買新樓而選用發展商二按嘅業主的確係持貨能力最低嘅人,佢哋揸乾晒手上嘅現金,買一層自己負荷邊緣嘅樓,希望時間能夠站在佢哋嘅一邊,帶佢哋脫離負資產嘅邊緣,亦令供樓負擔按年減輕。佢哋唔係同發展商對賭,因為佢哋其實同發展商同坐一條船──如果樓市冧檔,你估發展商收番層銀主樓,仲可以賣到好價錢,仲可以追收差價?肯定係賺少咗,連同手上嘅存貨都冧晒價。對賭嘅真正對手,係香港嘅地運,賭佢向上。只要香港唔冧,就算幾年後自己撈唔掂,賣咗層樓都仲可以有番啲水腳。萬一香港地運玩完,唔只樓市,全部一齊玩完,大把人陪葬,又有乜嘢所謂?記住,香港只有樓市嘅資產係保證永遠值錢,唔會停牌變零,仲係唯一可以自用,除非你攞啲股票去貼牆紙。

唔夠錢供樓變成銀主盤,而家升市嘅時候都有出現,尤其是個別知名屋苑,幾乎間間都要蝕讓,唔係乜嘢秘密。但係呢類銀主盤並無推冧樓市,一來數量唔多,二來而家係賣家市場,唔會因為其他蝕讓盤而成為殺價藉口。但係發展商一手賣出嘅時候價錢mark得盡高,的確令到買家轉售時毫無水位。而家買一手樓,要有心理準備,3年後鬆綁賣得,未必可以賺錢走人。而家買樓,要有住一世嘅準備,又或者當自己買車,出售嘅時候輸折舊係理所當然。冇呢啲精神狀態,買樓好大壓力。

後悔60歲仍冇樓揸手

靠父幹可以30歲未夠就上車,倒不如話老豆搵個仔做人頭,幫自己買多層樓。你話啲父母太過照顧子女,竟然出首期讓個仔供樓?你試諗吓,如果唔出首期,個仔出去租屋住,簽落成身卡數,到頭來搞唔掂搵財仔,泥足深陷,最後又係邊個執手尾?咪又係個老豆。與其遲早搵財仔,倒不如一開始就搵財仔借錢買樓,等個仔交租嘅錢變成供樓,至少有一半係可以袋番落袋嘅樓價。你話點解咁後生就做樓奴俾層500呎(而家可能只有200呎)綁住自己?你唔明白,唔係咁多人識得欣賞同利用自由。年輕人浪費了身邊嘅自由而最後一事無成嘅,人數遠多於識得爭取自由為自己謀福利。耗盡了自由而發覺自己一事無成,感覺比當上20年樓奴更加悲慘。唔信?你覺得自己60歲嘅時候,會後悔一事無成多啲,還是冇層樓揸手多啲?應該係一事無成之餘,仲係一層樓都冇。聽落好似好無大志,唔諗啲驚天動地嘅功業,只係去諗點樣供滿層樓。但係你生存喺呢個時空嘅香港,見到林鄭恍似權傾朝野但係冇能力搵一個合心水嘅班子,讀咁多書只等待某日被人工智能取代,在自己出生嘅地方成為二等公民,你仲唔醒覺,原來供滿一層樓係你唯一嘅生活保障, 對唔住,冇人幫到你。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 引刀一快 2017-06-03 17:31:06
對賭嘅真正對手,係香港嘅地運,賭佢向上。

1,地運係要對比周邊環境,係咪香港地運一定好過深圳廣州?

2,地運與樓價亦要匹配,唔係有地運就可以唔睇價。

3,要睇未來發展走向。

4,清楚自身需要。

當人工智能可以取代真人嘅時候,依家地區嘅高級低級分野會以意想不到嘅方式重新分配,唔好俾呢日來臨呀。
2. 五十年内上海深圳也取代不了香港 2017-06-03 20:05:19
香港樓值錢是因為香港的地運,冇辦法,因香港太多優點。1. 法律基础是與英美接軌,採用的是作為金融中心必備的普通法。2. 訊息快速無阻全流通。3. 無外滙管制。4. 港元掛勾美元 5. 特區䕶照140国免签。6. 空氣,食水,食品安全,及治安完勝深圳上海 7. 医療教育 比深圳上海好得太多 8. 税率低及税務简单。9。機場航缐及效率 上海深圳拍馬追不上。

3. 香港竞争力公認全球第一港樓貴得合理 2017-06-03 20:13:29
深圳最大的企業是腾讯 (HK: 0700)。 你用機關槍指著騰訊的老板馬化騰,叫佢把騰訊改為在深圳交易所上市,佢都唔肯。馬雲也一樣,絕對不會白痴到把阿里巴巴放在深圳上市。深圳取代香港只是個笑話。
4. 引刀一快 2017-06-04 03:01:04
講到香港幾好幾好,買大陸屋嘅香港人一樣享受到,你冇大陸屋就肯定享受少好多。
5. 蕭峰 2017-06-04 10:26:23
內地70年產權,曾經有內地朋友透露,其實70年是有道理的,因為普遍樓宇質素是堅持唔到70年既,70年後再拆左重建。
6. WHY 2017-06-04 11:48:35
2 樓話在五十年内上海深圳也取代不了香港?五十年內中國會是世界領袖,勿說香港!香港已被反對派拖死了。如果情况繼續,10年後已被替代!
7. 向引刀‧土著‧自醉‧浪子‧阿井 說不 2017-06-04 11:49:18

新盤混戰:江女士稱50歲未有樓 很擔心加息 (睇片)

操普通話的天寰準買家江女士表示,自己有香港身分證,她說近年樓價一直升、一直買不到樓,而自己50歲仍未有樓,今天忽然醒悟過去的愚昧和無知,因此決定現時入市。她說早前向銀行查詢按揭後,被通知加息,很擔心銀行加息,恐懼未來再加息,更加恐懼人老珠黃時無瓦遮頭,只能努力工作,其實租樓住也要更加努力工作交租俾業主,又指可能找屋企人幫忙,否則跟傻燦‧土著‧自醉‧浪子‧阿井50歲未有樓瞓天橋底又有什麼區別?哈哈哈哈哈哈哈哈哈哈哈哈哈哈哈哈哈哈哈‧‧‧
8. 回6樓 2017-06-04 12:32:46
上海深圳10年內可以取代香港,就不用搞深港通同滬港通。2015年股災一役,出動武警拉沽空的人,行政指令禁唱衰股市,不準大股東在過了禁售期減持。外資看在眼中,嚇都嚇死。
A股已經被外資遺棄,一潭死水。要買大陸股票也只敢買港股。沒有外資參與,上海同深圳只能是國內金融中心。

內房及內地企業瘋狂買香港商廈,用錢投了香港信心的一票,因為佢地知道上海同深圳100年內也取代不了香港。


9. LYC 2017-06-04 12:46:08
預期未來十年,天橋底,公園,街邊等地方,入夜後將會越來越熱鬧。公屋排唔到,租盤劏房唔夠供應,租金爆升,淡淡前路恾茫,真係令人擔心。
10. 人仔取代不了港元 2017-06-04 12:58:58
中國外滙蓄備1年多就跌了一萬億美金,嚇到中央叫停人仔改革。港元重要性又被提高。人仔成不了國際貨幣,上海深圳最叻也只能是國內金融中心。

廣州就更不用提,根本連當香港對手的資格都冇。

大灣區龍頭只能是香港。中資心中好清楚,所以敢用天價狂掃香港住宅用地及商廈。

大陸媒体多年来唱衰香港,但大陸資金却非常睇好香港前景。錢比口水老實!
11. 回LYC 2017-06-04 13:04:07
LYC兄不用太擔心,香港年輕人有遠見,已經開始在中環金鐘旺角鬧市練過瞓街的生活,因為佢地知道將來佢地一定會瞓街。LYC兄不用太擔心,香港年輕人有遠見,已經開始在中環金鐘旺角鬧市練過瞓街的生活,因為佢地知道將來佢地一定會瞓街。😀😀😀
12. LYC 2017-06-04 15:01:10
我反而唔係太擔心年輕人,30-40年後,或許有可能會有足夠公屋供應。
最令人擔心的是數十萬落錯車的中年人,因為好明顯,中長期房屋供應係接近冇!
13. 引刀一快 2017-06-04 16:15:37
To 8樓

你呢種係一種你死我亡嘅觀念,唔適合用嚟判斷中港關係。
14. 回引刀兄 2017-06-04 16:43:06
你死我亡就系大陸傳媒及好多大陸人喧染出來的。日日都在吹水話上海深圳取代香港,怎么香港邊沿化,但實際上又冇本事做到,連馬雲集資都要首選香港。班大陸明星更連生仔都要從死来香港医院生,有咁巴闭的上海户籍都唔要,口不對心,真搞笑。
15. 引刀一快 2017-06-04 17:03:34
To 14樓

大陸官媒一般都唔會講“上海深圳取代香港”呢類說話,記憶中就係江仔咁牛屎講過一次,因為影響統戰,講就係民間聲音多啫。
使咩理佢哋講乜,唔通佢地話取代,你就搞港獨?

該點做就點做,大灣區其他地方一樣係快速進步中,就算香港再好,都唔表示要將自己局限喺香港。
16. 李老子 2017-06-05 15:30:36
老左無錢可以攞綜援,申請住公屋,根本唔需要瞓街。

17. 狗頭猫 2017-06-19 11:01:54
香港九成綠化地才是真正價值。一流大都會身處九成綠化地兼見山見水, 世間罕見 , 人地想學冇咁易 。如 山上起滿一幢幢樓如墓碑, 咁就真是係咁先。
18. Pc0701 2017-06-19 21:25:26
"你唔明白,唔係咁多人識得欣賞同利用自由。年輕人浪費了身邊嘅自由而最後一事無成嘅,人數遠多於識得爭取自由為自己謀福利。耗盡了自由而發覺自己一事無成,感覺比當上20年樓奴更加悲慘"
唔同意作者講到"樓奴與自由"好似可以二揀一咁,
其實唔做樓奴幫自己儲錢供樓的話也要做租奴儲錢交租幫業主供樓呀?
就算黐住父母住,家用也一定再交多D表示下先得呀!
除非住公屋俾政府資助,或瞓麥當勞,高樓價的香港一定冇自由。


19. 同意 2017-06-19 21:40:44
同意這說法
唔同意作者講到"樓奴與自由"好似可以二揀一咁,
其實唔做樓奴幫自己儲錢供樓的話也要做租奴儲錢交租幫業主供樓呀?
就算黐住父母住,家用也一定再交多D表示下先得呀!
除非住公屋俾政府資助,或瞓麥當勞,高樓價的香港一定冇自由。