恒生指数收报25389点，跌395点，成交988.7亿，单是腾讯（00700）一只股票已经推低指数110点。昨天恒指跌几百点完全系因为腾讯俾官媒闹两句，但你相唔相信腾讯就此一沉不起？目前股价跌番去6月头嘅水平，俾人有机会追番错失咗嘅入市机会。除非你认为有机会冧市，否则要买就趁手。
股票如果可以稳定派息或者稳定增长，系可以做到股价斜线稳步上升，腾讯同领展（00823）就系呢啲。稳定派息容易睇到，稳定增长好多时候要事后先知。腾讯增长次次都可以交到功课，但系基数愈嚟愈大，迟早有日增长放缓，到时就要靠派息或回购支持股价。腾讯市值只有苹果嘅一半，后者嘅市场已经系全世界，腾讯仲有待进军全球。除非官媒继续攻击手游荼毒少年，否则呢个增长故事仲未有耐停。
股票都可以斜线上升，冇理由楼价一定要上上落落，唔可以斜线向上。股票收息要除净，买楼收租冇除净呢回事，价息兼收。股价要上升，一定要靠盈利上升，永远唔赚钱嘅公司冇可能股价持续上升，迟早有回落嘅一日。你唔使谂计帮层楼赚钱，只要银纸保持贬值，你层楼自己就识升，无论你买得几贵，时间一定企喺你嗰边帮你，只系长定短嘅问题。楼系升得慢过股票，但股票会买错，又要识落车，兼且冇自用价值，除非你用嚟贴墙纸；楼可以自用，10年唔升都起码住足10年。在香港，平常百姓缺乏保存财富嘅工具，唔系买股票就买楼。香港嘅股票咁凶险，蓝筹股都可以被沽空机构狙击，大价股都唔一定稳阵，有乜办法唔系一窝蜂走晒去买楼？
未来港股同A股会背驰，A股愈嚟愈多人买，港股愈嚟愈缩，因为港股买得过嘅已经买晒，A股就刚刚开始逼人买。内地房地产同香港房地产亦都背驰，因为内地房地产嘅泡沫厚过香港，香港楼价贵得嚟都比内地扎实。香港嘅楼价以收入中位数嚟计系全球第一，不吃不喝要储18年先可以买楼。但系同类计算并未包括「北上广深」四大名城。用同样嘅计算方法，四大名城
嘅市民要几多年不吃不喝嘅生活先可以买到楼？40年！辛苦过香港！中国作为世界第二大经济体，香港身为国家主要城市之一，楼价系最「宜人」嘅地方，冇空置社区，冇烂尾楼，兼且系住得人，空气、食物、交通都适合居住；加上移民政策极之宽松，几乎任何内地人有心要嚟香港居住，总有办法成功，试问楼价又点会唔升？政府辣招其实系有效，如果冇辣招，我肯定香港人过去几年更冇能力买楼。
记住，全世界政府只会防止楼价下跌，你见政府出招㩒住楼价上升，只系因为惊升得太快将来会爆煲暴跌。新加坡楼市跌足15季，从2013年高位下跌12%。4年跌12%，湿湿碎，都已经要减厘印，希望扭转市场气氛。
对股市，政府可能任你输；对楼市，政府从来都系积极干预。近期股票吓怕咁多人，又会赶一批人入市买楼。
App下载
