楼市今年就一字记之曰升

　　2017年回报最高嘅投资原来系加密货币，平民百姓要在去年年尾先发觉。佢系投资定投机，在现今嘅世界都唔使分得太细。黄金系咪投资？黄金冇息收，只系博佢升值，等下手接你货，仲唔系庞氏骗局？危机出现嘅时候黄金升得特别明显，表示佢系冇经济效益，纯粹系危急时用嚟避难作资产储存，只因全世界都信黄金，全凭个信字。咁究竟系投机定投资？留番畀学术研究，但留意只系挂住学术研究，好难发达。

　　加密货币今年一字记之曰爆，唔系爆升就系爆破。爆升系因为大家刚刚发觉加密货币是什么一回事，开始有门路可以购买。

加密货币唔爆升就爆破

　　有货嘅唔舍得沽，冇货嘅抢住买，仲唔爆升？爆破系因为政府开始觉得加密货币唔对路，趁佢未大到不能倒下时，要开始管。但系加密货币等於人民之间嘅互信协定，散布於全世界嘅公开记数账簿，政府可以点管？唯一方法系禁。所以，2018年大家将会见到好多国家计划出手，用唔同方法令你买卖唔到加密货币，咁就令佢爆破。究竟加密货币系会向上爆定向下爆？视乎人类相信加密货币嘅速度是否快过政府出手，当全世界认同加密货币，等於人类经过几千年时间相信咗黄金，人与人之间建立了嘅可信记账制度就有佢嘅价值。

　　楼市今年就一字记之曰升。2017年头好多专家叫你唔好买楼，信佢哋嘅结果系你手上嘅钱只可以买更细嘅楼。其实你唔使系专家，你用普通常识去谂谂，一处人口增长嘅城市，大量移民想涌入居住嘅城市，资金净流入嘅城市，你认为呢个城市嘅房屋会平？会冇人买？一个城市，如果一直有人嫌贵，等待楼价跌就可以买楼，你认为楼价可以大跌？只要一小跌，呢啲等候多时嘅人仲唔冲入场买楼？要楼价持续下跌，只有两种情况，一系人口外移，觉得呢个城市无法居住，又或者经济持续下滑，居住嘅人搵唔到食，民不聊生。香港未来点睇都唔似呢两种情况，刚刚相反。咁你话，仲要唔要专家出嚟指点你？