地產博客 > 樓市散打王 返回
瀏覽人次:9005    回應:4
樓市散打王
揼到大髀內側瘀晒
 
方卓如
2017年12月29日 (信報)

  加密貨幣嘅泡沫升幅,令其他泡沫例如股票同地產完全唔入流。泡沫其實都有好多層次,例如啤酒泡沫,泡沫消散後,仲有杯啤酒過你飲。但如果係梳乎厘嘅泡沫,入口有如空氣,咁就正如股票前輩所講,買資產買着空氣,遲早渣都冇。

  加密貨幣嘅泡沫,就係可以渣都冇。只不過,佢哋嘅泡沫仍未成形,仲有好大改變空間。Bitcoin面世差唔多10年,係今年你先聽過仲參與買過,3年前Bitcoin仲係小眾玩意,今日已經討論佢會否代替黃金。

  下年泡沫會變成怎樣,冇人預到。一朝梳乎厘由虛變實成為蛋糕,到時就冇人話係龐氏騙局。都係嗰句,你成世人都活在泡沫年代,如果一聽泡沫你就行開,你而家應該幾窮。

  香港房地產都話係泡沫,但係教授買泡沫,地產大炒家又買泡沫,眼都唔眨,點解釋?睇淡樓市,唔係應該全部沽晒現貨,等跌市撈底?從來睇淡嘅人做嘅嘢同佢講嘅嘢相反,辯稱為市場一面睇好,自己咁有份量,惟有睇淡,將預測變做賭波開盤,個個買曼城,惟有落注曼聯,平衡啲。市民唔係賭大細,係想聽真實情況。人人講升,你惟有講跌,博人哋錯你啱攞掌聲,大開眼界,害了市民。

  香港樓市同比特幣一樣,易升難跌, 因為想沽嘅人唔多。買咗樓唔敢沽嘅人大把,6千萬沽咗層樓,你覺得佢好有錢,但佢想買番嚟住嘅樓要一億,佢就覺得自己好窮,唔敢沽樓。比特幣一樣,好多幾千蚊沽咗比特幣嘅,而家揼到大髀內側瘀晒,恨錯難返。手上仲有貨嘅,打死唔會沽。以前叫人買股票,買完要放落床下底唔理佢,好多人都做唔到。但係比特幣買咗唔理佢,好多人做到,大家都要等到泡沫爆破一刻,先至心甘命抵。沽壓唔重嘅比特幣,睇升贏面大過睇跌。除非你有貨,否則唔好立亂沽空期貨,輸死你。

  今年搵到餐晏仔食。2018年,唔使講,資產組合要有加密貨幣,否則你好難跑贏2017。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 牛牛 2017-12-29 07:30:35
😱😱😱😱😱
從來睇淡嘅人做嘅嘢同佢講嘅嘢相反,辯稱為市場一面睇好,自己咁有份量,惟有睇淡,將預測變做賭波開盤,個個買曼城,惟有落注曼聯,平衡啲。市民唔係賭大細,係想聽真實情況。人人講升,你惟有講跌,博人哋錯你啱攞掌聲,大開眼界,害了市民。
😱😱😱😱😱

你講緊邊個啫?
2. 肥佬 2017-12-29 18:31:33
講我囉
3. 睇淡最安全 2018-01-01 08:15:27
可以排隊等公屋,一於租住等。希望個無良業主今年加租加少啲。最好美心面包也不要加價。
4. 樓淡大髀內側都瘀曬 2018-01-01 14:57:57
淘大花園從2003年到2017升咗10倍。如果當年買按揭保險上車,只俾10%首期上車,等於10倍leverage, 回報放大到100倍。未計收咗15年租金。

過去十五年沽咗港樓的淡淡,個個大髀內側都瘀青。教訓是在香港地有能力而不買樓,也是有風險的。