地產博客 > 樓市散打王 返回
瀏覽人次:7073    回應:0
樓市散打王
銀行為爭生意,要量多過要價
 
方卓如
2018年1月17日 (信報)

  希瑪(3309)上市個個都賺七成,頭槌飛扣埋利息都賺幾萬,呢個世界就係邊個有錢就可以再搵錢,毋須技術含量。香港獎賞有腦嘅人,同時亦獎賞有資本嘅人。有腦嘅人可以累積到資本,但有資本嘅人唔代表一定有腦。希瑪證明有腦嘅人搵到大錢,有資本嘅人只搵到茶錢。唔好在意咁多人靠住資本可以不勞而獲,你有頭腦,朝早瞓醒就可以超越佢哋。

  財政司司長話按揭成數唔可以降低,因為未來利息會上升,萬一按揭成數放寬,那些剛剛好夠錢上車嘅市民,就會第一個受害。但其實,無論按揭成數是多少,總有一批是掹掹緊嘅業主,用盡成副身家去供樓。利息加少少,呢批業主都會受害,好鬼辛苦。

  反而係因為而家按揭成數太低,業主要攞好多錢做首期,一啲剩餘資金傍身都冇,甚至要動用發展商貸款,令自己陷入高息漩渦。銀行按揭成數太低係令業主毫無防守力,一下子加息或逆境打來,層樓就要急速沽售。

  如果通過到銀行壓力測試,按揭成數提高只係怕樓價下跌,業主變負資產唔還錢,銀主盤唔夠還債。不過,實例證明,利息上升唔代表樓價一定跌,業主負資產都情願續供死守,銀行其實好安全。況且就算放寬按揭,最多咪加多一成,離九成按揭仲有好遠。政府連少少按揭成數鬆綁都唔肯做,仲要以為咁樣係對市民好,可見政府仲未知自己正在推市民去借貴利,加息嘅時候佢哋仲受害。買樓嘅需求唔會因按揭成數低而消減,反而令佢哋千方百計去借到更盡買樓,市民受害得更快。

  唔放寬按揭嘅原因係利息將會上升,但美國加息咁耐香港都冇跟,原因正正係政府唔放寬按揭。銀行大把錢,有能力俾一半首期再借銀行錢嘅,愈嚟愈少,咁銀行有乜法子加息?而家仲有H+1.27厘嘅優惠筍價,平過上年嘅H+1.28,證明銀行為爭生意,要量多過要價。你知唔知去銀行借按揭幾難,唔止業主想放寬按揭,銀行仲想。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼