特區政府教育局明令接受政府資助的幼稚園,不得教導學生寫字,引起一班有兒女、有兒孫嘅朋友熱烈討論。首先講幼兒(K1-K3)學生應唔應該學寫字,老一輩就以為點解唔得呀?我地阿爸阿爺嗰一輩,如家裏有個錢,就會三四歲入學讀私塾,背誦三字經、千字文,跟住學揸毛筆寫字;上一輩人即使因種種原因,例如戰亂而輟學,以致教育程度不高,但一般都有中文底子,識寫書法,呢樣嘢當然係歸功於小時候背誦之學與自細學寫字之故。
現在教育專家有新研究、新理論,認為幼兒過早在幼稚園學寫字,有害無益,一啲理論係睇落有道理,古老人唔明白嘅,就係幼兒體格未發育完成,過早學寫字會對坐姿,脊椎、手腕嘅發展有影響,如一向姿勢不正確,長大後身體就容易發生毛病或甚至有少少缺陷,其次,如幼稚園太過重視寫字功課,相等於迫使孩子犧牲其他學習玩耍時間,視寫字為苦差,久而久之,會發生厭學情緒。前者係「體格」不良影響,後者係心理不良影響,21世紀家長聽見就怕。
係唔係因為一啲新研究、新理論出現,就會令教育局禁止幼兒學寫字嘅指引,大受家長歡迎呢?哈,又唔係噃,左丁山問過幾個家長,佢地意見一致反對幼兒唔寫字,Y女士話:「教育局官員啲仔女梗係預備留學英國㗎啦,對香港教育實況堅離地。幼稚園學生畢業都未識寫字,點入DGS,DBS,喇沙呀,傻嘅咩。」Y女士嘅仔讀九龍塘著名幼稚園,K1就學寫一、二、三、四呢啲簡單中文字啦,會一路一路加上去,目的就係要培訓學生考入上述著名學校,呢啲幼稚園係私營「國際幼稚園」,以英語、普通話教學,因不受政府津貼,可以當教育局指引冇到。問另一小Y Y,佢個女讀緊K1,又係已經學緊寫字,不止一二三四,連個山字都識寫;再問記者G,佢個仔讀幼兒班,下一學期升K1,佢話:「好多家長群組嘈緊呀,話學券幼稚園唔准學生寫字,三年後一定落後於人,學生唔夠爭,家長諗辦法轉仔女入讀國際幼稚園呀!」果真「一國兩制」,幼稚園學生係行緊「一港兩制」,莫講係吳克儉,搵李國章做番教育局長都冇法子解決「幼稚園兩制」問題,問今日成為英文ghost writer嘅肥仔K,記唔記得幼稚園學寫字,佢諗咗一輪話:「我讀啟思幼稚園,明玩嘅啫,冇功課做,記得讀完K3都唔多識英文!