有年轻朋友几个月前准备买楼，当时我话趁物业代理得闲，业主又愿意开门俾人睇楼，睇多几间，万一财爷在预算案中宣布减辣，可以立刻做决定，如果等撤辣之后才去睇楼，睇得嚟都蚊瞓，年轻朋友话唔想浪费时间，一定要等撤辣之后才去睇楼。
年轻朋友唔明白物业投资者「快狠准」的意思，尤其是个「准」，以为买了楼之后楼价上升，或者卖了楼之后楼
价下跌就是准，眼光好准的意思，其实只是其中一个解释，「准」字另一个意思就是准备工夫要做足，连楼都唔去睇，又点可以做到出价快，决定狠。
撤辣之后年轻朋友问我有冇相熟代理可以带佢去睇楼，他认识的物业代理全部都唔得闲，就算得闲都话业主唔肯开门，只能接受业主的要价或者还一个价俾业主考虑，买成千万的住宅单位唔系买棵菜，冇楼睇点敢落注，但佢唔买有其他人买，唔通其他人买楼唔使睇楼，谂极都唔明，年轻人唔知道，买楼的人当然要睇楼，不过并不是今日睇，而是楼市淡静的时候去睇，唔做好准备工作，有荀盘靓楼都唔识得执。
准备工作除了睇楼之外，亦要睇吓自己荷包，银行取态，现在银行按揭批核甚严，虽然话免除了2%压力测试，但银行要求买家有足够的收入，如果唔及格，按揭成数可能会较少，有人话唔怕，如果楼价上升，即使银行唔批，由於政府撤销了SSD，可以将买入的单位摸走，千祈唔好咁样谂，银行已经预先公报唔做摸货生意，即是冇下手买家，如果上唔到会就唯有挞订，到时就会眼白白睇住楼价上升，而自己就要挞订，到时真系喊都无谓，唯有怨自己唔做好准备工作，荀盘是留给有准备的人。
App下载
