有報道指從去年初至今，財務公司數目減少7%，總數160間，很多人唔明白，財仔最多唔借錢俾人，唔做生意，點解要執笠，而且數目仲咁多，諗極都唔明，一定有鮮為人知的理由，其實又不是什麼秘密，財仔收唔到數，抵押品資不抵債，連老本都蝕了，唯有宣布執笠。
香港的財務公司大致分為兩類，第一類就是專做私人貸款，那些經營者大多數是江湖人士，膽正命平，每單貸款金額亦不高，即使有壞帳，最多是賺少一些，唔會搞到要執笠，另一類就是要有抵押品的財務公司，現在執笠的大多數是這類財務公司，有抵押品反而要執笠，很多人想都想唔到。
財仔所收的所謂抵押品，絕大多數是物業，財仔大多數是會按照銀行的估價報告批出七至八成貸款，但有部份新
晉財仔唔知道，由於受到金管局所限，大多數物業最多只能批出五成按揭貸款，由於成數不高，銀行的估價是非常手鬆，往往是超過物業的市值，以往我們亦不時聽到某些物業成交價，是低於銀行估價，買家買得非常之抵，其實，並不是買家買得抵，而是銀行的估價高，即使如此，銀行的風險亦不大，但有部份買家攞住銀住估價報告問財仔借錢，七至八成按揭變成八至九成，而現在樓價亦下跌了超過兩成，不少財仔要輸入肉，有部份甚至連老本都輸埋，如果那些財務公司問其他機構融資，現在就會出現資不抵債，想唔執笠都唔得。
其實，咁多財仔執笠的主要理由並不是資產價格下跌，而是太多債仔唔還錢，財仔收唔到高息反而要俾利息其他財務機構，債務愈來愈重，而那些執笠財仔的負責人雖然很多都是銀行家出身，借錢出去是冇問題，但如何收欠債就不是他們的專長，而投資財務公司的人大多數唔識做財務公司，遇上樓價下跌，債仔不還息不還本，執笠是唯一選擇。
App下載
