哈哈，刀兄果然系有心人！
坦白讲，关於大湾区，落注就冇喇，但都真系有上去望过几眼。冇去打搞刀兄，怕你话我搞搞震冇帮衬，哈哈！
走马看花，所见所听所闻，小小分享如下：
(只系以香港人可以朝朝返到香港工作嘅深圳为例）
1）大陆楼残得好快，十五年过后嗰啲，都几难睇得上眼。其中一个原因，系管理差，原来大部份都冇业主立案法团，想换管理公司，难过登天。
开头新楼未买晒，灯火通明，但一买晒之后，话知你光管坏、笠坏，一於关人隐事，但管理费就照收。夜晚大堂、走廊黑过鬼，d砖爆哂起哂都冇人理。
2）如果要做按揭，利息贵，系香港嘅两三倍。
3）使用年限，只有40年至70年不等，仲唔保证有冇得续期。我个人相信有，但冇人会话到俾你知有冇，话有嗰个都系吹水。
点解大陆楼嘅使用年期咁短呢，我谂系大部份人都相信，层楼捱唔到50年。
4）楼宇品种繁多，好易唔小心就赖嘢，又红本又乜本，唔同品种有唔同限制，买之前真系一定要搞清楚。
5）大部份AA诚信有问题，信佢一成，双目失明，不如直接去搵刀兄帮手好过。
好多AA都唔熟例，乱吹一通，净系识讲过去两三年升咗几倍，跟住落来一两年仲会升多几多几多，单一模式氹你买。
单刁一完，你有事想搵佢帮手都几难。如果不幸交易出现问题，你去投诉，佢间公司会话系AA个人问题，公司唔负责，同埋个AA前日已经辞职，公司都搵紧佢。佢会同你报埋公安，但都系得个报字。
香港AA都有害群之马，但情况一定冇咁严重。
6）大陆唔兴活化或重建旧区，睇罗湖区就知，揸住只有等老化，唔升值或者卖唔出都几头痕，当然自住当交租就冇所谓啦。
大陆有新城区同旧城区之分， 20年左右，新城区就会变左旧城区，然后喺第二个地方又会出现新城区，旧城区就等死。冇得搏清拆，搏清拆基本上输硬！清拆重建呢d国家机密，几时会轮到你执宝吖，所以唔好谂。
7）睇完几个口岸区嘅楼，发现喺楼价上，屯门、元朗仲平过深圳。你买得起佢嘅尺价，但你未必买得起佢嘅尺数。所以香港人唔好再发梦，以为自己可以撤退返去几个口岸区生活，然后香港返工。而家深圳湾新少少嘅楼，尺价都港纸2万以上。
深圳都谂唔掂，何况大湾区其他地方？你真系唔使返工？所以除左退休养老，我看唔到大湾区嘅价值。投资搏升值？政策市，唔升点算？租金又远远cover唔到。
但我要补充一句，租就真系好抵租，特别系新楼，靓嗰只，真系黄豆嘅价钱，星级嘅享受。
不过如果求住，屯门元朗点都方便过深圳呱，如果budget 有限，谂吓d二手居屋好过。我老友地产A话，实用面积六七百尺嘅三房，白表都系六球左右。
8）今日人仔贵，你冲个头埋去，但长远而言人仔系要贬值，呢个因素必须喺考虑入面。
当然，小弟都系听财金专家预测先至话人仔长远会贬值啫，会升都唔出奇，到时就会系另一个故事。
以上系小弟走马看花所得嘅少少片面之词，专业意见当然系要请教刀兄啦。刀兄有请，可以请指点指点要在香港返工但迷失嘅一群吗？
App下载
