哈哈,刀兄果然係有心人!
坦白講,關於大灣區,落注就冇喇,但都真係有上去望過幾眼。冇去打搞刀兄,怕你話我搞搞震冇幫襯,哈哈!
走馬看花,所見所聽所聞,小小分享如下:
(只係以香港人可以朝朝返到香港工作嘅深圳為例)
1)大陸樓殘得好快,十五年過後嗰啲,都幾難睇得上眼。其中一個原因,係管理差,原來大部份都冇業主立案法團,想換管理公司,難過登天。
開頭新樓未買晒,燈火通明,但一買晒之後,話知你光管壞、笠壞,一於關人隱事,但管理費就照收。夜晚大堂、走廊黑過鬼,d磚爆哂起哂都冇人理。
2)如果要做按揭,利息貴,係香港嘅兩三倍。
3)使用年限,只有40年至70年不等,仲唔保證有冇得續期。我個人相信有,但冇人會話到俾你知有冇,話有嗰個都係吹水。
點解大陸樓嘅使用年期咁短呢,我諗係大部份人都相信,層樓捱唔到50年。
4)樓宇品種繁多,好易唔小心就賴嘢,又紅本又乜本,唔同品種有唔同限制,買之前真係一定要搞清楚。
5)大部份AA誠信有問題,信佢一成,雙目失明,不如直接去搵刀兄幫手好過。
好多AA都唔熟例,亂吹一通,淨係識講過去兩三年升咗幾倍,跟住落來一兩年仲會升多幾多幾多,單一模式氹你買。
單刁一完,你有事想搵佢幫手都幾難。如果不幸交易出現問題,你去投訴,佢間公司會話係AA個人問題,公司唔負責,同埋個AA前日已經辭職,公司都搵緊佢。佢會同你報埋公安,但都係得個報字。
香港AA都有害群之馬,但情況一定冇咁嚴重。
6)大陸唔興活化或重建舊區,睇羅湖區就知,揸住只有等老化,唔升值或者賣唔出都幾頭痕,當然自住當交租就冇所謂啦。
大陸有新城區同舊城區之分, 20年左右,新城區就會變左舊城區,然後喺第二個地方又會出現新城區,舊城區就等死。冇得搏清拆,搏清拆基本上輸硬!清拆重建呢d國家機密,幾時會輪到你執寶吖,所以唔好諗。
7)睇完幾個口岸區嘅樓,發現喺樓價上,屯門、元朗仲平過深圳。你買得起佢嘅呎價,但你未必買得起佢嘅尺數。所以香港人唔好再發夢,以為自己可以撤退返去幾個口岸區生活,然後香港返工。而家深圳灣新少少嘅樓,呎價都港紙2萬以上。
深圳都諗唔掂,何況大灣區其他地方?你真係唔使返工?所以除左退休養老,我看唔到大灣區嘅價值。投資搏升值?政策市,唔升點算?租金又遠遠cover唔到。
但我要補充一句,租就真係好抵租,特別係新樓,靚嗰隻,真係黃豆嘅價錢,星級嘅享受。
不過如果求住,屯門元朗點都方便過深圳呱,如果budget 有限,諗吓d二手居屋好過。我老友地產A話,實用面積六七百呎嘅三房,白表都係六球左右。
8)今日人仔貴,你衝個頭埋去,但長遠而言人仔係要貶值,呢個因素必須喺考慮入面。
當然,小弟都係聽財金專家預測先至話人仔長遠會貶值啫,會升都唔出奇,到時就會係另一個故事。
以上係小弟走馬看花所得嘅少少片面之詞,專業意見當然係要請教刀兄啦。刀兄有請,可以請指點指點要在香港返工但迷失嘅一群嗎?