当父母系老奉

　　房委会推出三个居屋单位，绿表白表申请人士，照例又系蜂拥而至，四千几个单位，已近三万人攞表申请，本港嘅房屋需求，直情系超级强刚性质，政府无论推出几多公屋居屋，都难以满足。李嘉诚五十几年前已经睇出呢一点，毅然转行，唔做塑胶花，转攻地产，从细做起，几十年后果然将当年香港地产之霸――香港置地，远远抛在后头，真系有先见之明兼有魄力也。香港置地在1950、1960年代有呼风唤雨之力，属怡和集团，边个敢话李嘉诚，郭得胜，李兆基，郑裕彤呢四位华资后起之秀，可以将置地撼低呀？其中李嘉诚更可以在发展地产成功之后，进军国际，在电讯、港口业务、公用事业及零售方面，於国际争雄，雇用海内外员工近三十万名，堪称世界华人之中，最有魄力杰出嘅企业家，史无前例，岂止是地产先知咁简单。

　　呢日有老同学夫妇自加拿大回港，未上邮船参加旅游团之前，抽空与几位同学一聚，到皇朝会吃午饭，席间一位同学K话香港地产升势强劲，佢有一间跑马地旧单位，作收租用，最近收回略作修饰、清洁之后，即刻有人承租，尺租53元。哦，同学K有楼收租，有楼居住，有钱买股票ELN收24%年息，直情系人上人！佢话：「诚哥讲有能力供楼自住嘅，唔怕买楼，我好信诚哥嘅啫，所以过往四十年悭埋悭埋，供咗三层楼。供完晒，又再加按供过，攞番三几百万买股票，供楼利息系2厘，唔供就笨，还钱做乜吖，买股票（例如Reits）有4厘息以上，即系银行借钱畀你赚钱。」一早听诚哥话，唔怪得退休生活咁富裕，我哋呢啲笨人只识买一层楼自住，直情跑输大市！不过「无债」一身轻，亦自得其乐。另一位同学A就讲到为儿子置业，畀晒五成首期，业主用自己及儿子个名，由儿子供楼，儿子打工薪水唔错，低息供楼，绰有余裕，哎，点知儿子最近话唔高兴父亲持有居住单位五成，要同学A写定「平安纸」声明过身后单位会归儿子所有！今天一啲青年，几缺乏耐性，唔怪得之，几个月前同地产代理L女士倾起，佢话亲耳听到一位二十岁出头男士在售楼处骂妈妈点解唔一次过付清而要留下五成楼价要佢去供！买楼靠父干爷干，似乎已系香港买楼铁律，但一啲年青人，视之为老奉，确实过份！