地產論壇
登入名稱
密碼
頁數:
當父母係老奉
瀏覽人次:17364    回應:4

當父母係老奉

 

左丁山

2018年3月28日

  房委會推出三個居屋單位,綠表白表申請人士,照例又係蜂擁而至,四千幾個單位,已近三萬人攞表申請,本港嘅房屋需求,直情係超級強剛性質,政府無論推出幾多公屋居屋,都難以滿足。李嘉誠五十幾年前已經睇出呢一點,毅然轉行,唔做塑膠花,轉攻地產,從細做起,幾十年後果然將當年香港地產之霸──香港置地,遠遠拋在後頭,真係有先見之明兼有魄力也。香港置地在1950、1960年代有呼風喚雨之力,屬怡和集團,邊個敢話李嘉誠,郭得勝,李兆基,鄭裕彤呢四位華資後起之秀,可以將置地撼低呀?其中李嘉誠更可以在發展地產成功之後,進軍國際,在電訊、港口業務、公用事業及零售方面,於國際爭雄,僱用海內外員工近三十萬名,堪稱世界華人之中,最有魄力傑出嘅企業家,史無前例,豈止是地產先知咁簡單。

  呢日有老同學夫婦自加拿大回港,未上郵船參加旅遊團之前,抽空與幾位同學一聚,到皇朝會吃午飯,席間一位同學K話香港地產升勢強勁,佢有一間跑馬地舊單位,作收租用,最近收回略作修飾、清潔之後,即刻有人承租,呎租53元。哦,同學K有樓收租,有樓居住,有錢買股票ELN收24%年息,直情係人上人!佢話:「誠哥講有能力供樓自住嘅,唔怕買樓,我好信誠哥嘅啫,所以過往四十年慳埋慳埋,供咗三層樓。供完晒,又再加按供過,攞番三幾百萬買股票,供樓利息係2厘,唔供就笨,還錢做乜吖,買股票(例如Reits)有4厘息以上,即係銀行借錢畀你賺錢。」一早聽誠哥話,唔怪得退休生活咁富裕,我哋呢啲笨人只識買一層樓自住,直情跑輸大市!不過「無債」一身輕,亦自得其樂。另一位同學A就講到為兒子置業,畀晒五成首期,業主用自己及兒子個名,由兒子供樓,兒子打工薪水唔錯,低息供樓,綽有餘裕,哎,點知兒子最近話唔高興父親持有居住單位五成,要同學A寫定「平安紙」聲明過身後單位會歸兒子所有!今天一啲青年,幾缺乏耐性,唔怪得之,幾個月前同地產代理L女士傾起,佢話親耳聽到一位二十歲出頭男士在售樓處罵媽媽點解唔一次過付清而要留下五成樓價要佢去供!買樓靠父幹爺幹,似乎已係香港買樓鐵律,但一啲年青人,視之為老奉,確實過份!

當父母係老奉
1. 孟波
2018-03-28 09:56
係老(奉),奉旨個(奉)。
2. 儒來
2018-03-28 10:11

父子情,母子情,D青年到中年之後便會體會。
丁山兄不必傷神!
3. Admin
2018-03-28 10:19
謝謝1樓, 文章已修正
4. 十一哥
2018-03-28 15:58
老奉…老舉…垃圾後生都唔拘。


頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。