放松按揭？

　　特区政府三大司长以张建宗最舒服，佢为官近40年，由新闻官做起，应对传媒早有经验，为人圆滑到不得了，记者想捉到佢甚么差错都好难，故此费事花时间麻烦佢。律政司司长以前高高在上，举起法治大旗，冇乜边个敢骚扰，但回归后因梁爱诗弄出一单胡仙事件，冇事搵事搞，难以服众，之后律政司就成为一个磨心，政治上难以脱身，黄仁龙司长叫做行事谨慎，低调，严守原则，任内冇乜风波，但到咗袁国强，因曾经做过广东政协，思维有啲与港英培训出嚟嘅法律精英有些微不同（虽则佢与戴耀廷系港大法律学院同班同学），遇上选举示威宣誓等事情，总令人有一种袁国强听强国人指点嘅感觉，於是佢嘅民望一路下滑，种种压力令袁司长体弱多病，经常肠胃不适，甚至要入医院，最后勉为其难做多半年先至走，做司长系好，但唔值得牺牲一生健康嘅啫。好嘞，换上一位潘太郑若骅，未入闸已软蹄跪低，陷入僭建丑闻，以后四年半有排捱。南华早报专栏叫佢快啲松人，林郑应该即时炒佢，相信林郑唔会听，但以后在外国人社会，郑大状已无诚信可言，香港本地人已视之为笑话。

　　财政司司长陈茂波一开始做局长就俾传媒砌，至今未能复原，好彩佢一味够勤力，埋头苦干，慢慢扭转低迷状况，最近佢讲到想话放宽按揭限制，按保可达九成，令不少80后朋友精神为之一振，话波叔呢次够贴地，希望佢能够说服老板林郑及其他官员，放宽首置按揭上限金额喎。当然，政府放宽按揭上限，必然被批评转軚、减辣，刺激楼价等等，故此政府依家好有顾忌，但如果波叔够魄力，真系放宽按揭上限嘅话，必然赢得80后市民喝彩声，民望一定上涨。

　　新年假期之时，在会所见到一批80后专业人士，有年青工程师、建筑师、会计师等等，皆是21世纪大学毕业生，多数自公屋出身，靠读书入大学而成为中产阶级，但人人都未买楼，只系租私楼，每个月交租交到肉痛，一对会计师夫妇月入十万元，尤其愤愤不平，因为以佢地嘅收入，以今日嘅低息率，即使按揭利率加到五厘，佢地仍然供得起楼。但偏偏受限於辣招，冇法子借到首期三成，你估个个都有父母帮忙嘅咩！自小住公屋，父母收入有数得计，如何靠父干？呢班人睇住楼价月月升，几乎心如刀割，大骂梁振英辣招无良。受过良好教育，收入较高嘅年青人点解多数反政府，呢样或者系原因之一。

　　林郑月娥竞选时之地产智囊，正是林奋强。林也大声疾呼，要求放松按揭，「助用家上车」（经济日报，1月12日），唔该林郑听一听！