地產論壇
登入名稱
密碼
頁數:
放鬆按揭?
瀏覽人次:18974    回應:6

放鬆按揭?

 

左丁山

2018年1月16日

  特區政府三大司長以張建宗最舒服,佢為官近40年,由新聞官做起,應對傳媒早有經驗,為人圓滑到不得了,記者想捉到佢甚麼差錯都好難,故此費事花時間麻煩佢。律政司司長以前高高在上,舉起法治大旗,冇乜邊個敢騷擾,但回歸後因梁愛詩弄出一單胡仙事件,冇事搵事搞,難以服眾,之後律政司就成為一個磨心,政治上難以脫身,黃仁龍司長叫做行事謹慎,低調,嚴守原則,任內冇乜風波,但到咗袁國強,因曾經做過廣東政協,思維有啲與港英培訓出嚟嘅法律精英有些微不同(雖則佢與戴耀廷係港大法律學院同班同學),遇上選舉示威宣誓等事情,總令人有一種袁國強聽強國人指點嘅感覺,於是佢嘅民望一路下滑,種種壓力令袁司長體弱多病,經常腸胃不適,甚至要入醫院,最後勉為其難做多半年先至走,做司長係好,但唔值得犧牲一生健康嘅啫。好嘞,換上一位潘太鄭若驊,未入閘已軟蹄跪低,陷入僭建醜聞,以後四年半有排捱。南華早報專欄叫佢快啲鬆人,林鄭應該即時炒佢,相信林鄭唔會聽,但以後在外國人社會,鄭大狀已無誠信可言,香港本地人已視之為笑話。

  財政司司長陳茂波一開始做局長就俾傳媒砌,至今未能復原,好彩佢一味夠勤力,埋頭苦幹,慢慢扭轉低迷狀況,最近佢講到想話放寬按揭限制,按保可達九成,令不少80後朋友精神為之一振,話波叔呢次夠貼地,希望佢能夠說服老闆林鄭及其他官員,放寬首置按揭上限金額喎。當然,政府放寬按揭上限,必然被批評轉軚、減辣,刺激樓價等等,故此政府依家好有顧忌,但如果波叔夠魄力,真係放寬按揭上限嘅話,必然贏得80後市民喝彩聲,民望一定上漲。

  新年假期之時,在會所見到一批80後專業人士,有年青工程師、建築師、會計師等等,皆是21世紀大學畢業生,多數自公屋出身,靠讀書入大學而成為中產階級,但人人都未買樓,只係租私樓,每個月交租交到肉痛,一對會計師夫婦月入十萬元,尤其憤憤不平,因為以佢地嘅收入,以今日嘅低息率,即使按揭利率加到五厘,佢地仍然供得起樓。但偏偏受限於辣招,冇法子借到首期三成,你估個個都有父母幫忙嘅咩!自小住公屋,父母收入有數得計,如何靠父幹?呢班人睇住樓價月月升,幾乎心如刀割,大罵梁振英辣招無良。受過良好教育,收入較高嘅年青人點解多數反政府,呢樣或者係原因之一。

  林鄭月娥競選時之地產智囊,正是林奮強。林也大聲疾呼,要求放鬆按揭,「助用家上車」(經濟日報,1月12日),唔該林鄭聽一聽!

放鬆按揭?
1. 有見地
2018-01-16 19:42
正苦係時候要檢討一下了。
2. 80後
2018-01-16 19:44
講中唒我們的憤怒FY35
3. 反常思维
2018-01-16 21:29
技術問題就話係誠信問題,人格有問題嘅就捧上天,唔通想係想香港快D香?
4. 舍神
2018-01-17 00:20
十個煲得九個蓋,唔搵多個蓋,跟本就係一個 unsolvable 的數學題!
由政府插手自由市場開始,便註定失敗啦!招,只會越出越多,也越來越多副作用。

放寬樓按成數,咪即係放寬追價能力! 刻舟唔通真係可以求劍?
別迷信行政手段可以幫到手了! 

自政府趕哂d有實力投資者去買細單位,強弱懸殊已是定局!
大家係咪好懷念,西九炒緊4,5萬一呎,而平民中小單位仲仲係4千幾一呎的日子呢!
管得人把貴價樓炒上天然後bbq,偏偏香港人就係眼紅仇富,最後受害的咪又係自己!

今天大叫放寬按揭成數,受害的咪又係上車人士!!


5. 地產人
2018-01-17 03:01

左先生:

閣下似乎搞錯咗,波叔懂樓市嗎?你咪笑死街坊啦!

真正要放寬按揭給年輕人上車嘅唔係波叔,而係林鄭,林鄭想幫基層市民買樓.而波叔公然反對林鄭放寬按揭,最近林鄭叫下屬統一口徑,佢至肯轉軑,你上網查下就知!

波叔甚麼出身?佢係CY提攜至有今日,佢一味反對放寬按揭,仲講到年輕人宜家買樓好大風險,令佢寢食不安!做戲做得太假,都係得把口做唔到嘢嘅庸官!

6. 十一哥
2018-01-17 19:16
放寬首置底Part、炒高…比呢兩年D納米炒家變現甩身、功德無量、接波D首置上到車…借條數又大…息一加就要扎炮先得、老左除自住…唔知有冇樓收租呢?到時千祈唔好趁高賣樓呀!


頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。