建造界之失（下）

　　几年前有朋友往大埔睇独立屋，经纪向佢大力推荐一间，理由系：「地下下层有地库，在里面打牌、唱K、夹band，包唔会嘈到邻居，好正，直情系买烧肉送多一嚿叉烧！」朋友当时知到有唐英年及梁振英之僭建新闻，知道僭建呢回事可大可小，唔愿意买，经纪话：「怕乜啫，呢度有不少住客系律师、工程师、高级行政人员，人人都系咁，你唔好去做官就得㗎嘞！」

　　唔做官就无人理，故此潘乐陶郑若骅夫妇住两间相连独立屋有无僭建物，之前无人过问，但郑若骅官运到，有特首睇起，委以重任，坐上律政司司长高位，咁就令附近街坊好唔得闲嘞，地政总署有排调查、跟进，唔通公然大细超，偏心某人咩。

　　郑若骅读书十分醒，读完土木工程，得到专业资格后，知道当年土木工程系男人世界，出入地盘辛苦，听粗口机会不少，於是转行读法律，成为大律师，好快就在建筑界走红，原因好简单啫，同时拥有大律师与特许工程师资格嘅法律界人士，甚为罕有，而香港建造业界兴旺，遇上工程合约纠纷，向政府索偿时（如起路时掘到古迹，政府延迟工程），有位大律师一听案情就完全明白（其他律师要仔细研究几小时先知问题所在），第一时间进入状况，拟定索偿策略，往往令政府律政署人员吃不消，挡不住，答应仲裁、赔偿，你话呢类大律师几值钱呢。

　　郑若骅大概已达视金钱如浮云阶段，「先生」潘乐陶又有大把身家，加入政府做高官，为香港法律界之首，几咁唔好呀，亦人之常情，不过佢退出商界，令建造界人士若有所失，好唔舍得，以后搞工程仲裁，打工程官司，搵边个好呢？商界之失，或会是政府所得。近日在马场见到另一位女工程师，佢话过往几年因立法会拉布，拨款延迟嘅关系，引起不少工程索偿，建造界发一笔大横财（故此全是建制派之工程界会不介意立法会拉布，暗地里好欢喜），政府尽量挡住，但一啲富二代业者热中於参加建制政治团体，不时上京与高人会面，顺便就笃佢地唔顺眼唔合作嘅特区高官几句，令高官不胜其烦，现在有个熟悉情况嘅工程师大状为政府挡驾，好使好用也！谁不知新司长又跌落僭建陷阱，声誉受损，面目无光，郑司长生於1958年，属狗，狗今年犯太岁，几烦㗎！