房产大买卖

　　怡东酒店盛传出售，作价二百几亿至三百亿港元，贵得惊人，唔怪得投资L话香港置地公司嘅股价（新加坡上市）近几个月系咁升，市场传得咁劲，相信必有原因，好事快近了。

　　究竟最后买家系边个？大热门自然系新鸿基地产，测量师K话，新地喺怡东隔篱，世界贸易中心嘅大业主，买埋怡东，一并发展，有着数，至於算盘是否打得响，就系成事在天。新地好识出价嘅，但置地公司亦识得要价，旗鼓相当，故此双方谈判已有一段时间，但始终差少少，未能射入龙门，传闻置地集团为求增加议价能力，提出公开招标，希望有第三个买家加入竞争，逼高价格，令新地焦急一下。呢条桥本来有效嘅，内地大集团，特别系保险资本（险资）有不少港币收入，来源稳定，用作购买大型地产项目，条数计得到嘅，点知讲数讲到转入直路之时，中央严禁走资，严格审查国企同民企在境外买入房地产，於是怡东酒店之内地买家，突然消失，正是商场如战场，怡东酒店之最后买卖，几难推测。

　　怡和置地在80年代中之前，睇错环境，急於迁册，曾出售大量房地产，包括山顶大幅地皮，中半山帝景园地皮，铜锣湾温莎大厦，湾仔夏慤大厦等等，买家系新地与华人置业，具皆赚到唔识笑，多谢置地都嚟唔切，其实怡东酒店在80年代中以后，亦有出售意图，当年左丁山服务之投资公司，早有听闻，但置地集团最后不肯出售，持有至今，市值升咗近十倍。呢间酒店如果唔拆咗重建，继续经营下去嘅话，因物业价钱已经去到顶角膏蟹，回报率不会理想，但咁大座物业，重建需时，机会成本亦好高，故此本港地产商对佢冇乜大兴趣，只系新地拥有近水楼台之利。

　　左丁山口痕痕，问投资L：「点解唔去搵海航倾呢？」投资L话：「今时唔同往日，海航正为启德地皮嘅过渡贷款（Bridging Loan）搵紧再融资（refinancing）倾到身水身汗，边度有心情去买怡东呀！」一言惊醒梦中人，十九大即将开幕，收购豪情不再了。企业急速扩大之时，若单凭大肆收购资产，必需要有一条稳定大水喉（steady cashflow），若系倚靠银行放水，十分危险嘅啫，银行一旦闩水龙头，好容易十载繁华一梦销㗎！