「方帅，你话买楼发达易过买股票，又话靠股票发达可以唔使本，讲多两句教吓我吖。」
「草蜢仔，我识鬼。我识就唔使坐喺度同你吹水，我见人哋咁叻，我都想有人指导吓我。有本事发达嘅人，必定系聪明人。如果蠢人都可以发达，呢个世界仲有穷人？你聪明嘅，使鬼人教；你蠢嘅，教你都学唔晓。
「不过话时话，大家都系聪明人，靠楼同靠股票嘅人好唔同。股票系纸一张，张张都一样，只系上面印嘅名唔同。楼就间间都系独一无二，沽一间少一间，买唔番一模一样。所以靠股票嘅人，唔会系储物狂。反而揸到一手靓楼嘅，会锡货唔沽。一个经常买买卖卖，另一个就善价而沽。楼市一个周期入面，股市可能已经上落10次。买楼嘅捱一个浪，买股票嘅要经过10次起跌，梗系股票输番转头嘅机会大啲啦。」
「咁即系话捱得过咁多起跌都唔死得嘅股票佬最聪明啦！」
「最聪明唔敢讲，最睇得化就一定系。草蜢仔你呢一行，英年早逝嘅见唔少，昙花一现嘅大不乏人，转型失败嘅亦有。聪明到极点就系睇化晒，到最后唔会再用钱去博，反而但求稳阵。买股票发达嘅，最后收山走去做放数同地产就最稳阵，留到自己份身家。你咁后生，博多十几年先谂都未迟，至怕冇十几年俾你慢慢玩。」
「点解？唔系咁快冧市啩？」
「唔系市冧，系你就嚟冧，唔够人争。以前发达靠勤力，靠食脑。将来发达，要靠本。以前啲人勤力，走多步，就系要知得比人多。再加上用脑，谂到人地未谂到，咁你就有机会发达。而家嘅世界咁快咁透明，你好难知得比人快比人多。用脑嘅人一街都系，你好难搵到机会跑赢隔离。相反，而家最令人有竞争优势嘅，就系你有冇本。有本，等於有张入场券，可以有机会俾你去选择机会。
冇本嘅，捉到鹿都脱唔到角。将来你同人工智能竞争，佢知嘅嘢多过你，谂嘢快过你，唯一你有佢冇嘅，就系资本。以前啲人话，人生最大嘅投资就系投资响自己身上，而家我话最大嘅投资，就系要尽快谂计累积资本，千祈唔好攞啲钱去学呢样读嗰样，到头来连个本都输埋。」
「哗，方帅，我谂到计搵到个本，就唔使问你啦，嘥我时间。」
App下载
