地產論壇
登入名稱
密碼
頁數:
將來發達要靠資本
瀏覽人次:11422    回應:4

將來發達要靠資本

 

方卓如

2017年7月26日 (信報)

「方帥,你話買樓發達易過買股票,又話靠股票發達可以唔使本,講多兩句教吓我吖。」

「草蜢仔,我識鬼。我識就唔使坐喺度同你吹水,我見人哋咁叻,我都想有人指導吓我。有本事發達嘅人,必定係聰明人。如果蠢人都可以發達,呢個世界仲有窮人?你聰明嘅,使鬼人教;你蠢嘅,教你都學唔曉。

「不過話時話,大家都係聰明人,靠樓同靠股票嘅人好唔同。股票係紙一張,張張都一樣,只係上面印嘅名唔同。樓就間間都係獨一無二,沽一間少一間,買唔番一模一樣。所以靠股票嘅人,唔會係儲物狂。反而揸到一手靚樓嘅,會錫貨唔沽。一個經常買買賣賣,另一個就善價而沽。樓市一個周期入面,股市可能已經上落10次。買樓嘅捱一個浪,買股票嘅要經過10次起跌,梗係股票輸番轉頭嘅機會大啲啦。」

「咁即係話捱得過咁多起跌都唔死得嘅股票佬最聰明啦!」

「最聰明唔敢講,最睇得化就一定係。草蜢仔你呢一行,英年早逝嘅見唔少,曇花一現嘅大不乏人,轉型失敗嘅亦有。聰明到極點就係睇化晒,到最後唔會再用錢去博,反而但求穩陣。買股票發達嘅,最後收山走去做放數同地產就最穩陣,留到自己份身家。你咁後生,博多十幾年先諗都未遲,至怕冇十幾年俾你慢慢玩。」

「點解?唔係咁快冧市啩?」

「唔係市冧,係你就嚟冧,唔夠人爭。以前發達靠勤力,靠食腦。將來發達,要靠本。以前啲人勤力,走多步,就係要知得比人多。再加上用腦,諗到人地未諗到,咁你就有機會發達。而家嘅世界咁快咁透明,你好難知得比人快比人多。用腦嘅人一街都係,你好難搵到機會跑贏隔離。相反,而家最令人有競爭優勢嘅,就係你有冇本。有本,等於有張入場券,可以有機會俾你去選擇機會。冇本嘅,捉到鹿都脫唔到角。將來你同人工智能競爭,佢知嘅嘢多過你,諗嘢快過你,唯一你有佢冇嘅,就係資本。以前啲人話,人生最大嘅投資就係投資響自己身上,而家我話最大嘅投資,就係要盡快諗計累積資本,千祈唔好攞啲錢去學呢樣讀嗰樣,到頭來連個本都輸埋。」

「嘩,方帥,我諗到計搵到個本,就唔使問你啦,嘥我時間。」

將來發達要靠資本
1. 十郎
2017-07-26 17:34


      草蜢仔好鬼蠢。

      有腦有本嘅就係超人。
      冇腦冇本嘅就係神童龜。



      
2. 十郎
2017-07-26 18:21


      講真 , 現在年輕人搵本的確幾困難 , 否則就唔駛成日話靠樹幹。很多人將80年代高息時間的供樓 , 形容得比現今難好多。其實不然 , 當年是樓平息貴 , 現今是樓貴息平。我籠統地將樓價乘利率 , 當年是2000X12% =24000% , 現今是17000X1.75%=29750%數字顯示今天難d。而且80年代工商業進入起飛期 , 工人日日加班 , 工資是加五計 , 很多人假期有祕撈 , 例如替工的士 , 太太跟子女在家中做外發手工業 , 總之每人都有兩份工。現在已絕響 , 希望各位安全到岸。

3. 草蜢仔
2017-07-26 22:08
十郎果真心精細算                    
4. 買唔到就勤力啲
2017-07-27 11:31
香港不乏大學畢業三四年,月入三萬幾,兩夫婦月入六七萬很平常,儲蓄有乜艱難吖,少啲旅遊吃喝玩樂就得啦。
親友當中不少這類,就算租客中也有两户要求承讓租住單位,始終有上進心勤奮節儉嘅一定買到樓。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。