甲级商厦短缺

　　英国伦敦五大律师行之一嘅Freshfields，在金融界无人不识，三十年来都在中环交易广场开门营业，今年都不堪租金高昂搬咗去鰂鱼涌嘅One Island East，大律师楼本来一定在中环甲级写字楼嘅，如的近律师行在历山大厦几十年，系人都知，若无不可抗拒嘅理由，呢类知名律师楼边度舍得撤离中区呀！今时今日嘅最重大理由就系租金贵，中环甲级商厦动辄百几蚊一尺，确系好恶顶。鰂鱼涌离开中环大约五公里，唔塞车好快就到，坐地铁系二十分钟左右，都唔算远，但太古地产旗下嘅太古坊商厦，租金只系中环嘅一半，对啲国际大行嚟讲，极有吸引力。

　　香港苦无地方可兴建甲级商厦，太古坊靠拆建残破工业大厦起家，太古地产苦心经营近三十年，抵佢有今日嘅回报。前几日，左丁山收到运输署电话，知道六月尾邮寄申请国际车牌，用支票交款80元，摆咗乌龙，居然将张支票写咗7月27日，於是运输署通知咁咁咁，最快嘅方法就系亲自去到鲤鱼门道12号东九龙政府合署五楼运输署交钱，於是在校友会午餐会之后，即刻由中环坐地铁去，有老友话：「你未必识路，不如坐的士去啦！」但又怕塞车，最后还是坐地铁，来回合共用咗两小时，包括在运输署内等候咗17分钟先至可以交钱取得国际车牌，时间损失就系一时大意写错支票日期嘅代价。好彩系坐地铁啫，在观塘地铁站D4出口行去东九龙政府合署，成条鲤鱼门道简直系一个停车场，货车巴士私家车的士塞到爆，根本寸步难行，成条路塞车比  平日下午德辅道中高出几倍。政府想话在九龙东打造另一个「中心商务区」，口号系「起动九龙东」（即以观塘为主），但在蓝田站与观塘站之间嘅大街，简直水泄不通，整个观塘区亦好塞，好似血管栓塞咁，怎么办？黄伟纶与陈帆两位局长要谂谂计至得。林郑月娥之竞选顾问之一系林奋强，强哥嘅「黄金五十」以前做过一个报告，指香港甲级写字楼不足，租金因而昂贵，令大量工作（白领，相对高薪职位）流失去咗星加坡，因跨国公司在港搵唔到适当写字楼，索性将办公室搬去星加坡之故。林郑上台后，请对症下药，提出解决方案，呢方面嘅需求相当大㗎。一幅在启德嘅商业用地卖出后，中标发展商预备起甲级商厦，大型嗰款，每层有近五万平方尺，听讲某大银行即时搵发展商倾，可能租八层喎！嗱，咁就可以留住啲职位在香港啦，陈帆局长快啲规划好启德嘅交通嘞！