地產論壇
登入名稱
密碼
頁數:
甲級商廈短缺
瀏覽人次:20922    回應:1

甲級商廈短缺

 

左丁山

2017年7月11日

  英國倫敦五大律師行之一嘅Freshfields,在金融界無人不識,三十年來都在中環交易廣場開門營業,今年都不堪租金高昂搬咗去鰂魚涌嘅One Island East,大律師樓本來一定在中環甲級寫字樓嘅,如的近律師行在歷山大廈幾十年,係人都知,若無不可抗拒嘅理由,呢類知名律師樓邊度捨得撤離中區呀!今時今日嘅最重大理由就係租金貴,中環甲級商廈動輒百幾蚊一呎,確係好惡頂。鰂魚涌離開中環大約五公里,唔塞車好快就到,坐地鐵係二十分鐘左右,都唔算遠,但太古地產旗下嘅太古坊商廈,租金只係中環嘅一半,對啲國際大行嚟講,極有吸引力。

  香港苦無地方可興建甲級商廈,太古坊靠拆建殘破工業大廈起家,太古地產苦心經營近三十年,抵佢有今日嘅回報。前幾日,左丁山收到運輸署電話,知道六月尾郵寄申請國際車牌,用支票交款80元,擺咗烏龍,居然將張支票寫咗7月27日,於是運輸署通知咁咁咁,最快嘅方法就係親自去到鯉魚門道12號東九龍政府合署五樓運輸署交錢,於是在校友會午餐會之後,即刻由中環坐地鐵去,有老友話:「你未必識路,不如坐的士去啦!」但又怕塞車,最後還是坐地鐵,來回合共用咗兩小時,包括在運輸署內等候咗17分鐘先至可以交錢取得國際車牌,時間損失就係一時大意寫錯支票日期嘅代價。好彩係坐地鐵啫,在觀塘地鐵站D4出口行去東九龍政府合署,成條鯉魚門道簡直係一個停車場,貨車巴士私家車的士塞到爆,根本寸步難行,成條路塞車比  平日下午德輔道中高出幾倍。政府想話在九龍東打造另一個「中心商務區」,口號係「起動九龍東」(即以觀塘為主),但在藍田站與觀塘站之間嘅大街,簡直水洩不通,整個觀塘區亦好塞,好似血管栓塞咁,怎麼辦?黃偉綸與陳帆兩位局長要諗諗計至得。林鄭月娥之競選顧問之一係林奮強,強哥嘅「黃金五十」以前做過一個報告,指香港甲級寫字樓不足,租金因而昂貴,令大量工作(白領,相對高薪職位)流失去咗星加坡,因跨國公司在港搵唔到適當寫字樓,索性將辦公室搬去星加坡之故。林鄭上台後,請對症下藥,提出解決方案,呢方面嘅需求相當大㗎。一幅在啟德嘅商業用地賣出後,中標發展商預備起甲級商廈,大型嗰款,每層有近五萬平方呎,聽講某大銀行即時搵發展商傾,可能租八層喎!嗱,咁就可以留住啲職位在香港啦,陳帆局長快啲規劃好啟德嘅交通嘞!

甲級商廈短缺
1. Ben Chan
2017-07-15 14:40
唔好保育,拆咗中環街市,馬上有一塊又大又靚地皮,起中環甲級商廈。
中環街市非常醜陋,保育做乜?中環街市地皮值過百億港元,如果叫保育人士埋單,保育人士實縮沙。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。