幼稚园不写字

　　特区政府教育局明令接受政府资助的幼稚园，不得教导学生写字，引起一班有儿女、有儿孙嘅朋友热烈讨论。首先讲幼儿（K1-K3）学生应唔应该学写字，老一辈就以为点解唔得呀？我地阿爸阿爷嗰一辈，如家里有个钱，就会三四岁入学读私塾，背诵三字经、千字文，跟住学揸毛笔写字；上一辈人即使因种种原因，例如战乱而辍学，以致教育程度不高，但一般都有中文底子，识写书法，呢样嘢当然系归功於小时候背诵之学与自细学写字之故。

　　现在教育专家有新研究、新理论，认为幼儿过早在幼稚园学写字，有害无益，一啲理论系睇落有道理，古老人唔明白嘅，就系幼儿体格未发育完成，过早学写字会对坐姿，脊椎、手腕嘅发展有影响，如一向姿势不正确，长大后身体就容易发生毛病或甚至有少少缺陷，其次，如幼稚园太过重视写字功课，相等於迫使孩子牺牲其他学习玩耍时间，视写字为苦差，久而久之，会发生厌学情绪。前者系「体格」不良影响，后者系心理不良影响，21世纪家长听见就怕。

　　系唔系因为一啲新研究、新理论出现，就会令教育局禁止幼儿学写字嘅指引，大受家长欢迎呢？哈，又唔系噃，左丁山问过几个家长，佢地意见一致反对幼儿唔写字，Y女士话：「教育局官员啲仔女梗系预备留学英国㗎啦，对香港教育实况坚离地。幼稚园学生毕业都未识写字，点入DGS，DBS，喇沙呀，傻嘅咩。」Y女士嘅仔读九龙塘著名幼稚园，K1就学写一、二、三、四呢啲简单中文字啦，会一路一路加上去，目的就系要培训学生考入上述著名学校，呢啲幼稚园系私营「国际幼稚园」，以英语、普通话教学，因不受政府津贴，可以当教育局指引冇到。问另一小Y Y，佢个女读紧K1，又系已经学紧写字，不止一二三四，连个山字都识写；再问记者G，佢个仔读幼儿班，下一学期升K1，佢话：「好多家长群组嘈紧呀，话学券幼稚园唔准学生写字，三年后一定落后於人，学生唔够争，家长谂办法转仔女入读国际幼稚园呀！」果真「一国两制」，幼稚园学生系行紧「一港两制」，莫讲系吴克俭，搵李国章做番教育局长都冇法子解决「幼稚园两制」问题，问今日成为英文ghost writer嘅肥仔K，记唔记得幼稚园学写字，佢谂咗一轮话：「我读启思幼稚园，明玩嘅啫，冇功课做，记得读完K3都唔多识英文！