茶餐廳亂話（925）BNO 只是校外課程，還未正式入大學

　　今日早上去到茶餐廳，見父子兩人有爭執，原來老豆應承個仔，入到大學就送一部車比佢，個仔可以入大學，但條件是要完成一些既定校外課程，考試又合格，就可以正式入大學，按以往紀錄，入學率相當高，所以個仔要求老豆現在買部車比佢，老豆話仲未正式入大學，萬一入唔到，就算可以收回，折舊條數都很大，所以堅持唔買車比個仔，今次真係老豆有理，仔亦有理，他們一齊問我如何處理，我話唔識，不過可以參考金管局做法，全茶餐廳的客人都靜了下來，兩父子的事竟然金管局可以解決。

　　既然問到我，我首先要講對強積金睇法，在疫情下，不少人在財政上出現了問題，正所謂人窮思舊債，有不少人打強積金主意，我亦同意政府容許有需要的人可以提取部分強積金，但就不能夠以BNO移居英國來提取強積金，金管局解釋是BNO不被香港政府承認，當然不可以作為合法文件提取強積金，情況好似個仔讀校外課程，不能算正式入學，老豆唔送車亦合情合理，但問題是校外課程的確是由那間大學開辦，同正式入大學沒有分別，個仔話只是佢老豆唔承認，似乎又有道理，其實，應該將個波交比英國佬，只要英國政府立刻承認那些用BNO申請移居的人是正式移民，不用等五年咁耐，有了這個資格，應該可以攞到已供強積金全額，這對申請人是好事，否則英國政府五年後話唔批准，都唔知點算。

　　我同個仔講，叫大學出一封信，表示如果完成所需要讀的校外課程，一定會被取錄，有了這封信，老豆應該會買車送比佢，個仔話有難度，英國政府亦唔會擔保以BNO移居英國的人，住足五年可以成為正式移民，大學又點會發這一封信。