改建迪士尼

　　特區政府成日講要增闢土地，增加住宅土地供應，以便興建多啲公屋畀N無人士上樓，但講一套，做一套，曾經宣傳轟動一時嘅土地供應專責小組，交完報告畀政府之後，黃遠輝亦已裸退，但現時政府做過乜？旅遊餐飲就話畀疫情玩死啫，土地唔會喎，新樓盤銷售仍然暢旺，政府何不趁住經濟低迷時期，多推土地？啱啱相反，政府計劃在第四季推出兩塊地皮：可建單位合供630伙咁大把，連同其他地皮，即黃竹坑港鐵站上蓋1,000伙，私人發展與重建項目1,150伙，全季供應總數係2,780伙。如果講財政年度（今年3月至12月），三季供應總數加埋係7,400伙，係乜嘢概念？地產專家、萊坊（Knight Frank）執行董事林浩文認為目前市場需求估計，每個財政年度供應2萬至2萬3千伙較為適合，到咗2023年，市場就會出現供應不足問題，可能僧多粥少。

　　即係咁，政府無力找到成熟地皮應市，只靠私人發展商拆舊樓重建，供應掌握在私人地產商手上，梁振英當特首時，曾埋怨曾蔭權政府凍結土地供應，不建房屋，曾蔭權之發展局長係邊位？當今特首林鄭月娥囉。

　　地皮唔係冇，只是政府冇決心，政府在9月25日收回迪士尼竹篙灣60公頃土地，大可用作建屋用途。迪士尼一直唔願意，不積極將土地擴建樂園之用，丟空近二十年，政府收回有理，迪士尼近年已全力着重拓展上海迪士尼，對香港小市場興趣漸失，加上疫情打擊迪士尼全球樂園業務，已宣佈裁員二萬八千人，在此環境下，仲要喺香港霸住幅地做乜？政府收回之後，唔該盡快規劃改變土地用途，作住宅用地。改變用途須得城規會同意，算幾合理，但原來亦要得迪士尼董事局通過，咁就麻煩，有排都未掂，亦反映出當年董建華政府與迪士尼談判發展協議，幾咁被人佔了便宜。

　　如被迪士尼玩殘，都冇辦法嘅啫，蝕底啲，用錢買起迪士尼樂園，賠錢送走佢，將土地合併興建一個新住宅區，面積共38公頃加60公頃，共98公頃，即98萬平方米，點都可以興建萬幾伙公屋、居屋啩？一定快過填海造島搞明日大嶼吖，迪士尼樂園對香港經濟之貢獻以後只會日漸萎縮，棄之不足惜，何況佢呢間公司掛住大陸，早已無心戀棧香港！