地產論壇
登入名稱
密碼
摧毀球場
瀏覽人次:12597    回應:107
摧毀球場
 
左丁山
2019年1月8日 (蘋果)

  土地供應專責小組向特首再提交報告,之後召開記者招待會,甚麼時候都唔揀,偏偏揀咗在12月31日大除夕下午見記者,都唔知係甚麼樣的公關策略。每年元旦,有三張報紙放假休息(信報、經濟日報、南華早報),其中兩份係財經新聞報紙,大除夕下午開記招,令呢啲報紙啼笑皆非,況且好多公司機構在大除夕午飯過後已經放工,人人去參加不同歡樂活動,邊會有心情嚟消化土地報告呢類硬新聞!

  唯一可信解釋就係老經驗傳媒人大編輯所講:「就係唔想你地知咁多、討論咁多,人人放假之時先至爆大新聞,分明就係想大事化小。」只是土地供應乃香港頭等大事,想化小並不可能,放假回來,大家就立即爭辯不休。最多人同意嘅係發展棕地,至於收回部份粉嶺高爾夫球場(8個洞,32公頃),填海及發展新界農地等就意見紛紜。根據中文大學嘅隨機抽樣民意調查(並非極度不科學嘅填點心紙調查),年紀大市民贊成近岸填海,年輕人/壯年人(18至39歲)反對近岸填海,年長人士及私樓住戶最反對收回高球場,可見得發展土地選項方面有階級性及年齡分歧。普遍而言,香港財富多集中於50歲以上市民及多集中於私樓居民,左丁山在本欄講過,收回高球場之深層本質係階級鬥爭,「眼紅症鬥爭」,並非純粹理性爭辯,現在睇吓民調,此觀察初步成立,用英文講就係"Have-nots vs Haves",總之你有你講,我有我講,無妥協可能。民主黨尹志堅就係着眼選票(「沒有者」的選票)而大力要求收回球場,可能在民主黨選票計算之中,啲「擁有者」人數較少,可以不理。工聯會麥美娟顯然持同一觀點,驚死執輸,同樣大力要求收回球場。呢個選票算盤是否打得響?未必喎,2016年人口統計,香港人口歲數中位數係接近44歲,最大年齡組別在50至59歲,呢個組別人士多主張發展新界農地,反對收回球場。中產富裕人士相信多是這班人,民主黨與工聯會同聲同氣採取嘅政策就是令這批人不滿。填點心紙民意顯示,主張收回球場之比例高達96%,應該是有心人發動嘅,殊不科學化。收回部份球場,摧毀球場之完整性,令香港國際金融中心/世界城市失去一件寶貴文化遺產及一級國際高球場,只有文盲政府先至會做。香港自毀長城,新加坡一定最高興,新加坡有21個高球場,聲言收回3個還有18個,最靚球場故意設置於CBD中心Marina Bay,價值連城,又唔見新加坡收回?下次林鄭見到李顯龍,李總理會唔會講聲多謝呢?香港自動放棄一項競爭力,新加坡最歡喜。

摧毀球場
1. 魚蛋論
2019-01-08 12:12
收回哥爾夫球場,重點係要有錢佬冇波打,好閉翳,等佢哋響冷氣房由朝坐到晚,啲富貴病出晒嚟咁囉。

以後傾生意去麥當勞傾,食下食下,等佢哋一個二個變成滑嘟嘟咁樣。

雖然我係環保分子,但係最好斬晒哥爾夫球場啲老松樹啦,一棵都唔好留低,咁就公平啦。

至於第時響嗰度起咗樓,送俾我都唔住,去哥爾夫球場嗰條粉錦公路落一場雨整左半年都未搞惦大家知唔知?
2. 十一哥
2019-01-08 13:44
今次貴族波地令到班貴族失哂方寸、老師傅都亂哂何尺、亂咁作…以下呢句有冇根據 ?……最大年齡組別在50至59歲,呢個組別人士多主張發展新界農地,反對收回球場。中產富裕人士相信多是這班人……~這班人~有幾多人 ? 高球會員又幾多人 ? 自己意願唔好強加比人 !  

重點在高球會員並非土地~擁有者~應該係~特權利益佔受者~

做生意唔一定要用高球場、幼稚電影睇得多…以為大deal係咁煉成嘅、亦有好多電影劇情…古惑團伙習慣喺高球場埋堆做deal嘅…夠空曠人又冇…偷聽難裝囉!

攞新加坡嚟比較 ?  點解唔先學習人地嘅公營房屋成就 ? 要比較D貴族玩兒多少 ? 黎民等房屋…喺要嚟住 ! 有人就做貴族辯護士…怕失咗笪殖民遺風地 !

棕土…唔代表係荒廢地、好多係民生硬需嘅運作地、搬空都要再揾代替用地、咁玩法衹係上屋搬下屋…冇實質增加土地供應…衹係虛耗社會時間同資源。

點解咬定要摧毀 ? 咁大笪地…最易規劃、因應原有樹木建築而設計保留…優化、絕對可以轉成為將來社區嘅特色。

人生到某階段…如果都冇法…以口説心…一生白活  ! ! !
3. 望東樓
2019-01-08 14:22
二樓,你咪搞錯,香樹輝冇乜料,料通常都係佢身邊嘅人比佢嘅。係星加坡打高球?閣下最好朝早五點起身,細佬有一次係滘西洲南場都幾乎中暑。

全港總共有一百八十個球洞,收返個塊邊角位都只係收返五個巴仙,濕濕碎。更有趣係深水灣、石澳呢啲真正權貴地方嘅場反而唔係點心表,反而係粉嶺呢啲次權貴場先比人郁。
4. 香港
2019-01-08 15:15
收回丁屋才能真正解決問題.  丁屋制度極不公平. 收半個哥爾夫球場冇乜用. 應該增加非常非常高的收費. 私人哥爾夫球場稅. 因為就算開放比公眾. 個個打工仔要返工點會去打?
5. 望東樓
2019-01-08 20:04
未必一定要收回丁屋,比方批准丁屋得三層變成三十層。不過咁就天下大亂囉。
6. 引刀一快
2019-01-08 21:58
飛地去大灣區係最好最快嘅造地方法,冇人支持,終歸咪郁呢D場囉,到時去大灣區打都一樣啫。
7. 3Cents
2019-01-09 07:06
星加坡政府早在2014年已決定不續租並收回3個高爾夫球場,給每個球場7年時間過渡期。


所以收回8個洞和一個停車場已經是非常合邏輯的建議,不會對高球發展有太大影響之餘(不要忘記香港還有一個54洞的公眾球場),球場附近的配套非常適合在短時間內興建公屋/居屋/私樓,成本效益理想。


8. 自我陶醉
2019-01-09 09:20
收8個洞都幫唔到幾多,仲要放棄每年舉辦嘅國際賽,不如唔好收。

石澳個球場短到離奇,18洞得64桿,而用嘅人又少,收番嚟起豪宅好過。
9. Koichi Fuyumi
2019-01-09 09:23
填點心紙民意顯示,主張收回球場之比例高達96%,應該是有心人發動嘅”

為什麽支持保留球場的有心人不發動另一個活動去推低數字?數字可以輸但做人唔可以輸器量
10. To 8
2019-01-09 10:42
醉哥, 填好個島, 南面用黎放貨櫃, 荔景葵涌, 收番黎起公屋好過。
11. 自我陶醉
2019-01-09 11:39
回8樓

非常同意,嗰邊啲地仲好用,又近市區。

我覺得香港人愈來愈短視,我唔明點解咁多年青人反對填海,就算唔為自己諗,都應該為下一代想,只靠收地永遠都滿足唔到未來需求。

12. 引刀一快
2019-01-09 12:37
自我陶醉兄

個海填得嚟,海關都撤得喇,同阿爺攞地,想幾多有幾多,仲可以有廉價大陸勞工、建築材料,平靚快,根本唔使郁D球場、公園,仲可以帶動經濟,再諗遠D,復興香港工業都得,填海嘅錢,用嚟做呢D好過喇。
13. To 12
2019-01-09 13:04
快哥, 而家時興唔駛做有錢收, 你唔搵啲野俾本土人做土人只會更飯來張口, 無厘頭丟四千落乞兒兜都話伸手攞煩, 切鋼筋深夜出新聞發佈明顯係最高層趕睇完才可以出, 已經係最快, 都俾人鬧, 腸粉出黎講唔好意思, 咁以後第二朝囉, 唔好又嫌慢又抽秤隔夜係咪要造假喎。
14. 自我陶醉
2019-01-09 13:05
引刀兄

每次你講飛地,我腦中都有好多問號。

點樣確保所有同區居民都願意賣出或租出土地? 唔肯賣又如何處理? 留下的原居民又算是香港人嗎? 以後交香港稅定大陸稅? 消息一出,幾百萬人湧去嗰邊你係咪收哂? 我將要走的資金埋在地下,等轉移後換成港幣,情況點樣控制?

飛地係跟香港法定大陸法? 跟大陸法的話,即係唔屬於香港管轄範圍,同移返大陸有咩分別? 如果跟香港法點解可以唔經立法會通過,任請廉價勞工? 

15. 腥港人
2019-01-09 13:41
回14樓,法制上跟深圳灣果套就得,反正個基礎係香港租界。

反而圍住香港嘅福田、羅湖、南山都係市區,飛得去邊?向南飛去萬山群島的話,同起東大嶼又有幾大分別?

最後,石澳球場好似係真正私人地,同粉嶺場個玩法唔同。
16. 法制上跟深圳灣果套就得
2019-01-09 15:05
將所飛之地轉晒做郊野公園, 准許土葬, 與老美簽訂飛地關係法而成新獨立關稅區, 等等, 唔知得唔得? 
17. 告密者
2019-01-09 17:24
這件事應該不間單, 請看陳淑莊和陳百祥的辯論https://youtu.be/SBBy1s5W3Qc , 如果如她所講, 香港有两個球塲就可以收回一個作為建房用, 而且要等到租約完才收回, 等球塲使用者交回土地, 等城規改變土地用途, 等生地變熟地, 等賣地建樓最少要十四, 五年. 不如要求拿啓德的體育城來建樓? 她說批地做成不公平商業競爭, 為何不要求取消所有這類的批地, 只要求收球塲? 因不需要等收地, 生地變熟地, 只要等域規, 應該7, 8年就可以. 有沒有人想過為何? 她根本不是為市民往屋急! 犯民只是想殺鷄儆猴, 以后向那些以同樣方式拿到平地的機構要求捐獻就容易很多, 而且它們很有錢. 不捐錢的話, 你都知會發生甚麼事? 
18. 告密者
2019-01-09 17:37
現在犯民的老是水果報的創辦人, 他現在都缺水, 所以犯民才用這個理由去掠水. 真的為了窮人? 左丁山的意見我完全同意, 沒有這個球塲, 很多公司會把總部設在新加坡, 會有很多香港人失業, 特別是高薪的職位. 我以前的老就每個月去两次球塲, 如果沒有球塲, 他可能把公司搬走.
19. 告密者
2019-01-09 18:06
大家有沒有想清楚棕地的問題?政府曾試過想收回棕地, 但地主反對. 原因是棕地產生的現金流比農地多很多, 不應以農地的價被收回, 即要求以比農地價高的價錢被收回. 如果政府真的以高價收回, 大家想下有何事會發生? 請記著這個要求收回棕地的人是環保份子!
1) 如果個農地價, 當然無法收回土地
2) 如果以高價收, 全港的農地就會幾天內變成棕地, 做成生態災難, 原因是做破壞會有錢賺, 你會不做嗎? 你看得清那些環保份子的嘴臉嗎?
3) 棕地上的產業要搬去其它地方繼續生意, 就有機會破壞其它土地, 如果關門大吉, 那些工人就會失業. 有些產業根本是這個社會必需的, 一定要收回這些地, 是對環景及社會的破壞.
4) 政府直接收農地的費用會平很多, 為何要花費更多去收棕地? 而且還會對環景及社會做成破壞. 
現在你能否看清犯民及環保份子的嘴臉嗎?
如果你想到其它觀點, 歡迎發表
20. 自我陶醉
2019-01-09 19:42
17樓

雖然我都覺得粉嶺個球場有保留價值,但睇咗段片,完全唔覺得阿叻有points, 收咗8個洞就影響17萬從業員,更加係強詞奪理,亂吹一通。

大家唔好以為香港打高爾夫嘅人好少,一到旺季,去滘西洲打波嘅人其實多到不得了,基本上係一組跟一組唔會停,而且個個都好似趕住輪公廁咁急,完全失去打高爾夫應有嘅休閒感覺。

純粹從打波角度,滘西洲環境同球場質素,其實絕對唔比粉嶺差,但若然要休閒一點傾生意或聯絡感情的話,就唔係嗰回事了,因此,個人認為這球場有一定的商業價值,如果粉嶺收咗8個洞,使用率便會上升,可能連非繁忙時段,都變得繁忙,對休閒度有一定影響。

利申: 本人並非該球會會員,亦不是他們常客。


19樓

香港嘅不公平實在太多,丁權政策是其一,直頭係對其他土生土長嘅香港人不公平,點解冇人敢做嘢?  點解囤積住屋,影響民生嘅人,年年賺大錢,都要年年免差餉? 呢啲又關唔關犯民同環保份子事?

講到尾都係唔想得罪選民,政客自己嘅米飯班主,政治本來就是醜陋的,不管是什麼黨派。

我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。