地產論壇
登入名稱
密碼
頁數:
地產無力反彈
瀏覽人次:15782    回應:0

地產無力反彈

 

左丁山

2018年12月5日

  地產市道近來看似甚為疲弱,成交量大跌,細價樓成交價動輒從高峯價下滑十幾二十巴仙。早已上岸嘅代理P屬於元老級人物,到馬場捧自己隻馬,在沙圈上面又碰到左丁山,順口問佢隻馬有冇機會,佢話:「練馬師話志在輕舒步頭,開吓氣先,跑多兩場就有WQ機會。」於是買四重彩時拖腳冇拖佢隻馬,點知好慘情,佢隻馬最後五十米衝得好勁,啱啱跑第四,殺咗左丁山條四重彩。

  於是在大看台地下捉住地產P哭馬喪,地產P冇表情咁畀左丁山睇佢張飛:六隻互串四連環,就係冇自己隻馬。佢素來精於計數,絕不浪費注碼嘅,如果唔係,點會咁多年來,鳳凰無寶不落,買樓致富吖。

  輸馬乃小意思,大件事係樓市,地產P話加息陰影,中美貿易戰陰魂不散,經濟增長放緩係表面因素,直接影響因素係資助居屋以五二折出售,比較以前嘅七折,即係政府居屋帶頭劈價18個百分點,立即打擊可轉手公屋、居屋嘅售價,之後禍延細價樓上車盤。還有一個長遠心理因素,就係大規模填海,莫講明日大嶼有1700公頃,即以發展局局長最近不斷強調交椅洲填海1000公頃計,未來土地供應大增,點都會壓抑地產商累積土地儲備嘅意欲,而且同時急於在填海地推出市場之前(2030年左右),將手頭上嘅新界農地盡量加快發展,即係意味未來十幾年房屋供應有增無減。

  講講吓,又有老友出馬。要走番去沙圈,地產P加多一句:「或者純屬巧合,今次跌市,CCL指數連跌9個星期,在10月10日施政報告發表之前開始下跌,你話是否湊巧!」哦,實屬巧合啩。究竟香港人喜歡樓價升,還是喜歡樓價跌呢?狂升之時,不少評論大罵土地霸權,辣招無用。現在樓價下滑嘞,又有評論叫人寧買當頭起,跌市時不可入市。樓價升六成影響梁振英任內民望,假若林鄭任內,樓價跌四成,林鄭民望是否會急升,有利2022年連任?呢個問題都幾深奧,唔識答。

  地產P跑多一場立即揸車(有粵港牌)去珠海,佢話前星期第一次去,揸車好爽神,大路任佢行,沿途只見到巴士,少見私家車,更不見貨櫃車,係令佢覺得擁有粵港牌私家車最威風時刻,臨行佢幽左丁山一默:「等到你都可以揸車上橋去珠海,我就唔去趁熱鬧咯!」即係話,港珠澳大橋非常方便,但回本遙遙無期。

地產無力反彈
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。