休養生息

　　辛苦咗成年，遇上新年長假期，加上年初五星期三開工遇上破日，星期四初六係四絕日，不如索性放埋成個星期，飛去曼谷享受吓Spa好過，曼谷周圍有泰式按摩及Spa，價錢相宜，不過左丁山幾怕人多，衛生似乎欠少少嘅場所，有心理顧忌，只願光顧大酒店，價錢係貴啲，不過又唔係成日去，久唔久一兩次，冇所謂啦。以前在「文華東方」及「四季」浸過，覺得享受真係無以上之，成個人輕鬆到極，不知人間何世，大概這就是休養生息之道！人總係唔能夠不停咁衝呀、衝呀，機械也有金屬疲勞症，何況係人？

　　香港有位得到萬般寵愛嘅女士，據講好打得，每日睡覺四小時，平時好夜先至放工，吃完晚飯又返回辦公室挑燈夜戰，勤力到得人驚，十足鐵打咁款，呢類罕有人辦是否做領袖好材料？唔敢講，只知道自1950年計起，美國總統艾森豪威爾知道經歷大戰後，百廢待興，人民需要休養生息，恢復元氣，佢做總統就經常放假去打高爾夫球，做咗八年總統，民望甚高；1976年有一位花生總統卡達，南部農民家庭出生，自少就黎明即起，工作至夜深，入主白宮後，成為7-11典型，但勤力而冇用呢，做咗四年就俾老人家列根掃走，列根每日下午五時就離開辦公室，叫下屬處理餘事。有一次要與外國領導人開會，幕僚交一本電話簿咁厚嘅「簡要會議提示」俾佢，包括國防、外交、外貿等等美國政策及外國回應，第二朝，幕僚見到佢眼紅紅，仲以為總統轉性，刨Breifing Book刨到冇覺好瞓，點知列根話：「昨晚睇呢本電話簿幾頁就覺得雙眼垂下，於是開電視睇吓，啱啱做緊『仙樂飄飄處處聞』，係非常好睇嘅戲，於是一路睇到完，好夜先至上床，冇再睇過呢本簡報。」列根其後空槍上陣，見到外國領袖談笑風生，傾倒眾人。以戰後各位總統而論，列根與艾森豪嘅排名好高，卡達幾乎名列第尾。

　　做大事，學美國一啲管理專家教授嘅講法係work smart，唔係work hard。勤奮兼投入嘅領導人，總會每事問，隨時鬧下屬唔熟書，但真正領導之才，懂得休養生息之道，識得甚麼時候hea一hea嘅人，先至知道何謂收發自如，吼啱機會先至重拳出擊。五年前不少梁粉及記者罵唐公子hea，讚CY夠勤力；五年後又有人大讚林鄭好打得，莊曾hea足十年，講休養生息吖嗱，群起而攻之，今次香港啲記者冇咁輕易中計嘞啩，否則就真係simple and naive咯！