銀行與客戶的關係差到不得了

　　我做地產幾十年，與銀行搞關係亦有幾十年，從來未見過銀行與客戶的關係好似今日咁差，不少銀行搞的春茗酒會，大孖沙客戶根本唔去，大孖沙話費時到時面左左，所以唔去，而唔去理由就是銀行call loan call得太急，即使金管局放寬逆週期措施，銀行亦沒有改變態度，令到有不少業主要賣樓還貸，供應增加，銀行又唔係咁容易借錢俾人買樓，令到需求減少，樓價下跌是正常現象，令到銀行更加堅定不移向客戶call loan，在這情況下，銀行與客戶關係又點會好，就算日後市況好轉，樓價回升，銀行都損失了不少優質客戶。

　　有人話，欠債還錢，天經地義，的確冇錯，但客戶是有抵押品給與銀行，而抵押品價值往往是貸款金額兩倍，對銀行來說，除非樓價斷崖式下跌，否則銀行在出售抵押品之後是不會有損失，我相信大家亦聽唔到有銀行的按揭貸款有壞帳，只不過是銀行擔心有壞帳而向客戶call loan，有銀行的朋友同我講，銀行真係希望出現大額壞帳，就可以公開話call loan是對股東負責。

　　好彩香港是世界金融中心，有不少國家銀行在香港設有分行，香港銀行唔鍾意做的生意，其他國家是非常願意做，千祈唔好以為有什麼古靈精怪，其實是按照金管局規範，不會超越紅線，只是利息會高大約1%，那些國家銀行的主管同我講，發夢都想唔到在香港可以做到香港人的按揭貸款生意，怪唔之得香港是國世界金融中心，真的是當之無愧，試吓一間外國銀行可唔可以在新加坡做到新加坡人的按揭生意。

　　既然香港銀行對客戶冇信心，甚至唔理金管局呼籲，唔好無端端調整按揭客戶的貸款金額，而向客戶call loan，金管局只要取消一個條款，就可以解決這個問題，就是按揭客戶可以向其他銀行，財務機構甚至財仔尋求第二按揭，上限不能超過樓價兩成，對於承做第一按揭的銀行是沒有風險，就算去到最後，那個物業變成銀主盤，在出售後一定可以全數清還第一按揭的欠款，如果唔用這個方法，在銀行不斷call loan之下，銀行與客戶的關係是很難回復正常。