有建议市民可以提取强积金结余去做首置嘅首期,无论你有冇打算买楼,你都应该举脚赞成。强积金逼每个市民供养基金公司,但系佢哋收取昂贵管理费,表现并唔好过收费特平嘅ETF。
基金经理开始成为夕阳行业,将来唔系由人工智能拣股,就系索性买晒ETF跟市场同步。买追踪指数ETF嘅好处,就系指数公司帮你拣股。汰弱留强嘅指数,确保你买嘅追踪指数基金,一定系买啲当红股票。虽然,未必可以识於微时,在未爆发前就买入股票,好似南非Naspers买中腾讯(700),咁就母凭子贵。但系ETF几乎系立於不败之地,连ETF都输,市场好难搵到人赢。简单讲,强积金系蚕食你财富嘅隐形杀手。
楼价唔升 至少赚住
用强积金买楼,过去10年嘅比较,回报一定比你放在任何强积金投资组合高。哪怕你选择进取形组合,你有乜可能跑赢有杠杆嘅楼市?就算基金经理神机妙算睇中腾讯,佢受mandate所限,都唔可以一注独赢。唔借得又唔可以将鸡蛋放晒一个篮,冇一个基金可以帮你赚到尽。反而买楼,就算10年后原地踏步冇得升,你都赚咗住,交少10年租。用强积金买楼,香港人未谂赚,至少输少啲。
只系强积金可以用於首置会有后遗症。基金公司唔少人要失业,夕阳行业加快走入夕阳;政府可能乘机加供款额,要打工仔更少钱使,成世为层楼打工;中小企被迫增加供款,惟有叫员工化身自雇人士,到时候香港遍地初创企业。