有老友被銀行call loan call到失魂，最後都要以低於市價賣走部分資產還債，條氣梗係唔順，老友臨別贈錢之後，問我他對銀行有何臨別贈言，是忠言並不是刻薄
的說話。
老友應該知道忠言逆耳，講出嚟銀行職員未必啱聽，最好提醒追數的銀行職員，追數追得咁緊要，小心將自己的資產變成負資產，銀行職員聽後一定會唔開心，甚至會擔心自己的資產變成負資產。
昨日有報道，負資產數目大幅急升至2.5萬宗，很多人唔明白，在逆週期措施之下，負資產數目點解會升得咁急，去年第四季比第三季升超過一倍，是否九成按揭累事，這個說法沒有錯，不過並不是事實的全部，甚至一半都冇，我講大家都唔信，不少負資產是來自銀行職員的按揭，因為銀行職員可以借九成，而且利息大幅低於正常水平，所以，當利息上升，更多銀行職員買樓，所以才會出現咁多負資產，其實，我真係唔明白銀行職員明知銀行追數，樓價一定會跌，點解仲要買樓，唔通貪利息平些少。
現在追數的銀行職員心理負擔是很大，因為知道不斷追數，業主唯有以低於市價賣樓還債，做成樓價下跌，間接令到他們的資產變成負資產，如果唔追數，不但被金管局將軍，分分鐘連份工都冇埋，老友立刻話我錯，金管局已經講過幾次，並沒有左右銀行放貸準則，銀行追數是銀行自己的事，今次真係口同鼻拗，而現實就是，任何被銀行追數的人都會聽到銀行職員話只是金管局要求，他們都唔想call loan。
App下載
