不做中，不做保，不要介紹裝修佬

　　我老婆有大媽朋友來我們屋企食晚飯之後，見到裝修唔錯，叫我老婆介紹替我們屋企裝修的公司畀佢，我老婆不知幾開心，於是問我裝修公司名字，我話不做中，不做保，不要介紹裝修佬，我老婆話應該是不做媒人三代好，介紹裝修公司又唔係做媒人，點解不要介紹裝修佬。

　　做媒人唔係一定是男女婚姻的事，介紹人買嘢，例如買虛幣，賺錢冇人會多謝，蝕錢一定會畀人鬧，如果有介紹費，更加可能會惹上官非，介紹裝修佬畀人，輕則老友都冇得做，重則被人告，做介紹人做到俾人告，十分不值。

　　我又唔係未試過介紹裝修佬俾人，很久之前，我介紹一個裝修佬畀朋友做裝修，不久之後，收到裝修佬一個非常名貴禮物籃，打電話畀裝修佬，佢話我應得，我唔敢收，將禮物籃轉送畀那個朋友，並且同佢講，請佢跟緊裝修工程，有甚麼事我不會負責任，如果他唔滿意，可以唔用那個裝修佬，我負責所有損失，朋友話冇問題，我於是放心。

　　結果是裝修工程爛尾，老友梗係話裝修佬做得唔好，接駁唔得，收口又差，唔打算畀尾期裝修費，裝修佬則話老友 奄尖聲悶，經常改意見，令佢做多不少功夫，而且又唔肯加錢，如果唔畀尾期，裝修佬會告老友，我知道之後都話自己好彩，如果我收了那個禮物籃，今日就畀雙方埋怨，好似那些JPEX玩家，如果收了介紹費，今日就震過貓王。

　　我有多少不明白，老友脾氣很好，要求不高，點解裝修佬話佢 奄尖，後來我知道，老友不時帶朋友去睇裝修，老友冇意見，但是他的朋友有意見，本來已經做妥，又要拆過重做，現在老友對那些朋友亦有意見，老實說，別人裝修，如吹縐一池春水，關你鳥事，講多句都有機會得罪人。