地產博客 > 樓市散打王 返回
瀏覽人次:9139    回應:11
樓市散打王
買樓而沒有升值嘅好處,同租樓冇分別
 
方卓如
2017年9月17日 (信報)

  昨日聖馬利諾MotoGP,係羅斯嘅主場,但係偏偏羅斯自己揸電單車整親腳,要休息一個月,唔可以比賽,搞到成場比賽啲粉絲齋搖46黃旗,非常無癮。電單車係危險活動,超級高手都會出意外,普通人更加唔可以掉以輕心。

  首置上車盤未正式公布,恒地(00012 )即刻有反應,股價創新高。種種跡象顯示,首置上車盤唔止益中產,仲益埋地產商。地皮唔會同公營房屋爭,最現實係公私營合作,讓地產商低價甚至毋須補地價,發展手上地皮。

  有補地價優惠,發展商可以起更多樓,賣畀政府指定業主。如果係首置同私樓混合盤,發展商可以在同一地盤起私樓私賣,賺得仲多。首置未益中產家庭,有地在手嘅地產商首先受惠。

  首置收入限制高過居屋,但係市價折扣仲高過居屋,只有唔畀市場出售先可以抵消呢種唔合理嘅邏輯。不過,禁止市場出售同埋不能享受資本升值,亦都違反咗買樓邏輯。政府平價賣層樓畀中產家庭,如果冇咗資產升值嘅幫助,一樣係永遠儲唔到首期買樓,薪酬升幅係追唔上樓價。買樓而沒有升值嘅好處,同租樓冇分別,即係租公屋。

  萬一首置同私樓混合發展,首置客心理更加唔平衡。隔籬座樓價升一倍,我呢座就供完都冇着數,賣返畀政府都攞唔返個本,達唔到置業階梯嘅目的。

  夾心階層置業並非破天荒,不過唔太成功,因為政府資助一班有收入但冇資產嘅人,係好難達到公平原則。上一次夾屋失敗而回,係因為撞正1997後樓價大跌,苦主直情示威抗議想踢契攞返個訂。而家樓價急速向上,樓價似乎好難大跌。用市價四折賣畀有收入嘅人士,等於簽了一個超長期租約,等佢哋慢慢儲首期買私樓。但係出售限制,令首置客嘅福利比平價買咗層公屋嘅更不如,對累積財富非常不利。

  首置可能令你成世有屋住,唔怕交貴租。但作為置業階梯,令自己財富升值就未必做得到。等到10月細節公布,首置唔一定如想像中咁受歡迎。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 這次 2017-09-17 11:36:08
講到嘢
2. 引刀一快 2017-09-17 15:25:08
呢個首置計劃,就係剛需照妖鏡。
3. 只有發達剛需 2017-09-17 18:21:49
香港只有發達剛需,所以首置計劃注定失敗,同當年夹屋一样。首置减少了私樓供應,所以反而刺激私樓樓價升得更快。私樓有得炒,是港人心頭好。有私樓,見未来外母才有雞腿吃。
4. 賭仔 2017-09-17 18:26:46
去到葡京唔玩真錢,你去唔去呀?
5. 衰過夾屋 2017-09-17 19:37:44
首置屋太多限制,只能賣俾政府,完全沒有大幅增值可能,不可能可能升Le去私樓,連夾屋都不如。

港人靠買樓置富,負擔能力根本就不重要。2003貝沙湾4千一尺,大把人負担得起,咪一様冇人吼。

林太請妳三思!
6. 香港土著 2017-09-17 20:20:33
刀兄,唔使等到首置屋出爐,哩樹d妖都已經出晒嚟。之前話居住需求係香港樓價推動力班嘍囉,家陣又話冇升值潛力就買嚟都多餘; 又有嘍囉話買好過租因為租係淨支出,家陣又話買間樓冇得升就等於租樓... 哈哈~ 真係智者之言。
7. 首置計劃迫人搶樓 2017-09-17 20:32:47

OASIS首輪沽清 原價加推88伙

文章日期:2017年9月17日

【明報專訊】近期多個樓盤銷情都見理想,周五晚首輪130伙的會德豐(0020)啟德OASIS KAI TAK,首批單位即晚沽清,發展商昨加推88個單位,當中86個標準戶平均折實實呎21,131元,屬原價加推,而兩個首推的低座連花園複式戶,折實呎價高見27,261元。

大家被首置盤嚇到入市搶樓。啟德樓只賣2萬7千一尺,筍到爆。地價都就来3萬。

8. 香港土著 2017-09-17 20:35:24
唔係話買唔到樓要訓街咩?唔買都要租嘛!家陣政府提供安全網,平賣比需要"住所"的鋼需人士,買到咪唔使幫人供樓囉!更唔使訓街!LYC之流係咪要重新度下賣(私)樓口號呢?
9. 細價樓升到爆邊 2017-09-18 00:14:51
樓價失控爆升,年輕人無法上車,政府表明會起樓幫首次置業人士。事實上,新界區二線細價屋苑樓價亦已升至難以負擔,20個該類屋苑中,佔一半樓價在首8個月已升至少逾10%,其中屯門「二線屋苑」新屯門中心呎價更急升近24%,至平均實用呎價逾萬元,升幅遠高於整體二手樓價。

上車剛性需求殷切,今年細價盤樓價繼續癲升。東網追縱新界20個仍有400餘萬港元成交的二線屋苑,發現在今年首8個月,已有10個平均實用呎價錄雙位數字升幅,幅度介乎約10.7至23.9%,當中新屯門中心平均呎價升約23.9%至10,065元,為10個屋苑最大。事實上,反映二手樓價走勢的中原城市領先指數,同期僅升約10%

細價樓跑羸中原指數,已經成為定局。未來細價樓將越升越有。

10. 引刀一快 2017-09-18 03:17:01
香港土著兄

咪就係囉,1,成日有人話買咗老蟹都唔好賣,唔賣理佢升唔升唧!

2,俾十年租金,可以分期俾,唔限你住三十年四十年,當租都筍爆喇。

我呢幾日都唔唱大灣區咯,因為都係呢隻更值得先關注。
11. 向引刀‧土著‧自醉‧浪子‧阿井 說不 2017-09-18 08:39:24
9樓師兄,好消息喎,咁樣既樓市升勢,傻燦‧土著‧自醉‧浪子‧阿井之流,好應該深入冧冧自己的下半生,尤其最尾個幾年點過 !