因為呢幾年香港樓市,俾政府嘅有形之手攪到狗粥咁亂,現在連李嘉誠都知你 CY 想點想攪乜春!如果連誠哥都唔識睇,那我呢件蛋散,當然唔敢隨便估啦!
我意見都有嘅,大家研究下啦:
因為有 SSD ,我唔讚成短炒。
因為有 BSD,如果發展商以貼市價散大碼貨之時,又同你代付大部分 BSD及 DSD,咁大 6 陸客就唔好同拒客气上件啦!
因為有 DSD,如果幾年後樓市預計都係升得幾成,你走去買樓收租,咁你做做埋埋咪盞益左地代、律師同庫房?有風險又賺得唔多,你睇好樓市不如買地產股好過,起碼如果兩叁年內有乜冬瓜豆腐,股票可清倉但樓就要交埋SSD才走得!
如果一定冇樓不歡,那就唔好買果 D 供應重災區(例如元朗)嘅中小型新樓,因為呢 D 樓真係會源源不斷咁推,這些貨自住無妨,但收租三思!
唔少朋友喺呢年零問我在樓市進退步驟,我就叫他們睇表:
擁有自住樓者------除非樓換樓,雷打不放
既有投資物业------持貨過多可放一兩件做保險,其他坐以「袋幣」
租住私人樓者------要是你有首期又可過壓測,都係要想辦法上車
境外投資人仕------專買發展商貼市價又有補貼嘅新樓
希望樓換樓者------等政府減辣才攪
整多間收租者------升咗好幾年,又要先蝕頭注,那除非遇到超筍嘢,回報又過 4 厘,否則我唔提議囉
朋友法子兄的做法唔錯,低位入飽貨,然後收租坐享其成,再等衡平值去到 1.6才慢慢來清貨!