81万年薪霸公屋 疑向房署瞒入息

中西区区议会主席郑丽琼噚日凌晨喺葵涌丽瑶邨住所被警方上门拘捕，有醒目网民发现，原来丽瑶邨并唔系可购买嘅租置公屋，而系属於被称为「廉租屋」嘅一般租住屋邨，但系郑丽琼年薪达81.48万元，就算唔计区议会嘅杂项开支津贴，比房署规定10人或以上家庭嘅申请公屋每月入息限额59,950蚊都仲要高！

据悉，郑丽琼自1994年起已连续7届当选中西区卫城区议员，连做近26年，而现时一般区议员月薪33,950元，年薪达407,400元，仲有四年薪金总额15%作任满酬金。佢今届当选区议会主席，更可获得双倍人工，即月入达67,900元，仲未计区议会非实报实销杂项开支津贴每月7千多元。

为确保公屋资源可以分配畀社会上有迫切住屋需要嘅人，其实房署已规定若公屋住户嘅家庭入息超额五倍，就要迁离公屋单位，若超逾三倍不高於五倍则须交双倍租及差饷，都只可申请暂住不超过12个月。至於郑丽琼佢有冇向房署瞒报入息，香港文汇报昨日致电郑丽琼手机求证，一名男士话「暂唔接受任何访问」就随即cut线。

唔少网民都齐闹郑丽琼「霸公屋资源」，话要向房署举报，「一定要彻查到底。」好似「Lawrence Cheng」就话：「基（其）实好多YC（黄丝）都系住公屋，享受紧政府福利，但反政府，我扎根香港几十年都无公屋住吖！」「NicC Hs」就闹郑丽琼：「骗公屋，难怪咁残啦。」「成功王」则话：「房署一定要查呢个所谓议员主席，佢D（啲）收入点可能住公屋？」「Wt Ip」就呼吁：「咁要举报吓吽C咁高人工，都住公屋。」

网民揭违法建筑装置冷气

有眼利嘅网民仲喺报道郑丽琼住所外嘅相片另有发现。「Cyn Cbu」话：「违法建筑装置冷气！」

■香港文汇报记者 黄书兰