每次行過國金二期商場，午飯時分走過翡翠拉麵門口的話，總見一條長長嘅排隊人龍，下午兩點半後，仍然有十個八個食客喺門口等位，呢間食肆聽講來自星加坡，星加坡人辦上海麵舖加小籠包，做到咁巴閉，令人拜服。不過老實講句，翡翠生意係冇得彈嘞，碗麵與小籠包是否吸引得咁交關，就見仁見智，起碼律師A與左丁山有一次未夠十二點趁未有人排隊就走入金鐘廊間分店試食，大家感覺不外如是，唔值得在門口苦等。
另一間在國金二期機鐵站方向嘅添好運點心，同樣亦係排隊排到令人怕怕，好彩另設外賣，可以在門口落單，在商場行十零分鐘後就可以有得攞，急急腳走番寫字樓趁熱食，仍覺美味可人，最靚嘅就係蝦餃，雪山叉燒包與牛肉球燒賣，食極不厭，可惜唔可以當飯食，用作小食則無以尚之。
呢日蔡和平（Robert Chua）請食飯，到萬豪酒店萬豪廳，可惜冇行政總廚鄧家濠「美食之最大賞」嘅金牌菜式，侍應話得獎菜式（蘋果日報喺七月尾介紹過）會在九月上牌供應，有意捧場者請慢慢等。
蔡和平21歲就做無綫電視王牌節目「歡樂今宵」嘅監製，話佢係香港電視綜藝節目教父，冇人反對，其影
響力至今不衰。離開無綫後，羅拔創辦「華娛」，繼續電視製作生涯，估不到過了花甲之年後，進入古稀世代，竟然有魄力大搞飲食生意，近年一個成功傑作就係添好運點心。添好運當然唔係羅拔蔡創辦嘅，但佢早着先機，快人一步，在星加坡與朋友成立一間「添好運點心私人有限公司」，買入添好運之東南亞特許經營權（franchise），再在星馬泰菲分銷特許經營權，非常成功，已經開設咗幾十間添好運專門店。泰國經營權就由左丁山老友泰國A嘅老闆買入，第一間分店設在Terminal 21。左丁山問羅拔：「分店開得咁多，如何保證品質不會下降？」羅拔話每間分店自製點心，不設中央廚房，維持即叫即蒸靚食材嘅宗旨，務求持續發展，維持水平。佢自己又在香港創辦A La Bakery賣麵包、曲奇，用法國麵粉及Perrier礦泉水做包，在法國製造，空運到香港焗焙而成，連法國遊客都食完感到驚奇，點解法國包可以咁靚咁好食；趁中秋節又推出用法國麵粉、法國雞蛋與中國鹹蛋混合製成嘅月餅，味道好，不算甜，左丁山認為好食過半島奶黃月餅，當然與傳統蓮蓉月不同食法。
上星期四放工後返屋企，特登去到中環干諾道中68號，馬會投注站隔籬，行入A La Bakery買麵包試味道，估唔到黃昏六點幾，蔡和平夫婦會在店內坐鎮，與前雅虎香港總裁、新亞校友蔡寶德好似開會咁，蔡太熱情介紹種種不同麵包，對產品十分熟悉，開舖做老闆，力不到不為財也。
App下載
