茶餐廳手記（#396）美斯甩底與銀行call loan一樣，結果也是一樣

　　今日早上去到茶餐廳，有被銀行call 爆loan的客人話，美斯在香港唔出場是受到傷患影響，有理有據，合約亦應該有寫明，如果受到傷患影響，是可以不出埸，所以，基本上美斯是不用發文解釋，在微博發文已經好畀面，香港人應該收貨，唔好嘈咁多。

　　稍後客人又表示，現在香港啲銀行有冇搞錯，在借貸比率五成下仍然向客戶call loan，要求客戶因應估價下跌補差額，金管局應該叫停銀行call loan，咁樣call loan，考慮將資產搬走。

　　老闆話美斯甩底與銀行一樣按合約做嘢，完全合法，告都多餘，但結果也是一樣，客人會離開銀行，球迷亦會離開美斯，甚至邁阿密國際以及主辦機構，而事實上日本人已經行出第一步，美斯在日本場波只得28614人入場，而球場可以坐8萬8人，三分一都唔夠，估計日本人擔心美斯又甩底，入場睇波豈不是儍仔一名，所以，美斯要在日本施以渾身解數，盤扭頂射都做足，目的只是希望多些人入場，但可惜事與願違，如果美斯能夠在香港場波入場15分鐘，估計在日本場波入埸人數最少多一萬，去到最後，受重創的仍然是美斯。

　　客人話，美斯繞道而行，避免同特首握手，睇吓李家超尷尬表情，就知道美斯是最後贏家，老闆話咁就奇怪，美斯收咗錢又唔落場，就好似一個食霸王飯的人，從未見過一個食霸王飯的人與老闆握手，梗係繞道而行，尷尬應該是美斯而非特首。

　　估計三月份美斯不會隨阿根廷訪問中國，否則當時真係有傷唔可以出場，就會畀人話玩弄中國，條罪好大，都係唔去好過去，美斯損失應該較大。