将军澳与中环

　　在马场见到地产代理行高层，佢喜上眉梢，并非因为只马赢咗，而系手机不断收到资讯，佢啲手下捷报频传，在一手楼盘夺取「重大的胜利」，为地产发展商尽快达至销售目标，第一时间去库存，为人民争取到安居之所！

　　简单用香港话讲一句，佢啲手下搵到大量客仔买楼，为新楼盘一Q清袋，佣金收入丰厚，梗系高兴到极。香港如此多新楼买家，全不理会金管局发出之加息警告或甚么辣招，都唔知边个先至系大儍，系买楼嘅市民儍吖，还是陈茂波陈德霖两位儍呢？

　　唔理得咁多嘞，代理高层话：「左丁山，唔同你讲马，不如考吓你。将军澳楼盘晋海有好靓海景，附近有青山翠绿，住喺嗰度，人都会轻松啲，楼花尺价约一万五千多啲；另一楼盘My Central，位於港岛中心地段；楼下系湿货街市，只有极高层可以有啲维港景，每尺楼价三万五。两个楼盘同样畅销，加价加推一样去货快速。点解两者之间，尺价相差两万呀，同是9百尺单位就相差一千八百万元噃？」

　　左丁山立即答：「好易答啫，Location，Location，and Location，投资地产最紧要讲地区位置，将军澳靓楼楼价点会及得上中环。嗱，假设一位买家买咗晋海，在IFC返工，朝早要八点零就出门，如买咗My Central，朝早八时十五分先至起身梳洗，仍可以在九点前回到IFC返工。时间就是金钱呀！」

　　地产代理赞左丁山叻仔，有资格做地产经纪咁话。其实佢讲呢两个楼盘，就系一个活生生例子证明：时间就是金钱，相差一小时嘅方便（convenience），价值可高达两万元（每尺计算）。如果你有二千万元，你愿意用尺价三万五买一层511尺嘅中环新楼吖，还是买将军澳一层千三尺住宅呢？从另一个角度睇，有咁多人愿意买中环楼盘，亦显示目前香港有太多投资性资金，不愿闲置在银行收取零息，索性以高价买入市区中心楼盘，作出租用途，例子系：据报导，蒙民伟第二任太太买咗两个My Central单位，蒙太大把楼住啦，仍然要买，不排除系作收租用途。出租据讲可以租到每尺100元，有三厘以上回报，证明强劲租楼需求系楼价高之基础！