Hi tech唔再揩嘢

恒生指数收报28305点，跌181点，成交913亿。人类觉得而家市况好难捕捉，唔易赢钱，人工智能会点谂？人工智能操盘嘅ETF、AIEQ，开档两日已经跑赢标普500指数，证明就算大市冇乜确实方向，唔使扑中只爆升股，都一样搵到食。反而人类就拘泥於大市仲有冇力上升，会唔会位高势危，坐喺度等冧市。人工智能炒股票，人类最聪明嘅做法，就系偷睇人工智能买乜嘢，然后跟住买。AIEQ有公布购入股票持股量，有兴趣嘅自己可以捉吓盘路，睇吓你系咪可以好似柯洁咁，能够从人工智能身上提升自己功力。

Bloomberg分析华尔街边几样工种会受人工智能影响，麦肯锡又有出报告探讨华尔街前中后枱边张最受影响。但各方结论都系，人工最厚、智力要求最高嘅工作，未来5年减三成在所难免。咁而家嘅后生仔读咁多书做乜？开发人工智能只系需要几十人团队，每年全世界过百万大学毕业生，读完书仲有乜嘢路数？反而嗰啲读唔成书，日日挂住打机嘅废青，打得叻加入电竞队，随时杀出条血路受万人景仰。

所以而家教仔，唔可以成日叫佢读书，反而要畀佢尽情玩，玩到有一瓣成精，咁仲有机会出人头地，哪怕佢玩嘅系打机定腹语，只要佢肯摆时间认真玩，咁你就安乐晒。

阅文准备上市，预计反应比众安更热烈。2017年同1997年都系影响香港人思维嘅一年，1997年系令香港人知道楼价没有永远上升，叫而家任何一个买楼嘅人都问自己怕唔怕楼价跌，又叫任何一个等紧买楼嘅人有信心等；2017年，香港人终於醒觉hi tech未必揩嘢，hi tech原来都可以捞嘢，开始信科技股系真。以后任何想炒嘅股票，如果冇啲似样嘅科技元素，好难炒。香港最成功嘅本土科技股系乜嘢？GoGoVan？有时候科技都唔系一定要先进到识炒股票先系达标，简单地帮到人类生活改善已经有价值。

你穷一世精力都唔会谂到点样利用机器炒股票，但系用手机程式收集文章同订车送货，怕且都系思考能力范围。趁你仲有思考空间，快啲谂啲hi tech嘢，在机器取代你之前捞番笔。