不准买楼靠父干

　　呢日中午茶聚，律师W话佢间律师行虽然唔系大地产商御用律师楼，分唔到一手新楼畅销、卖唔切嘅好处，但水涨船高，佢地嘅按揭、买卖楼宇服务始终都系有得益嘅，地产部嘅生意系多咗。律师W话：「地产商最多谢梁振英喂佢地食肥鸡，我地都有啲豉油汁执到。」

　　2012年四月，个个惊梁振英呢位测量师，地产专家会以剧烈手段推低楼价，因为佢讲过不止一次：「要与地产商碰一碰」吖嘛，左丁山嘅校友地产王仲在校友会午餐会上大声疾呼：「细单位楼价必跌，以解民困，梁振英有办法嘅！」眨吓眼梁振英已经玩完，结果竟然系细价楼楼价大升特升，豪宅楼价大升，梁振英之一连串三D辣招系逼市民送钱俾地产商，全部涌去买一手楼，梁振英简直系地产商财神。

　　这个故事教训我地，人的本质好难变，测量师始终靠地产市场发达，基本任务就系为客户（地产商）搵银。过去五年，楼价升咗五成以上，上星期五差饷物业估价署发表最新数字，楼价指数连升17个月，指数去到339，17个月来升咗25%；租金指数亦升到183.9，系6个月新高。

　　梁振英政府采用嘅辣招，行内人如施永青一早话冇用，唔会压抑到楼价，但政府狡辩话，如冇辣招楼价升得更快。事实证明，施永青不断买楼，投资态度正确，相反，听信外资大证券商及本地分析师（如交银国际）讲嘢，就输足几条街，呢啲大行一年来不断唱淡楼市，无视市场趋势，令人怀疑佢地系凭乜嘢理论与数据嚟做分析嘅。金管局过往两年不断采用所谓「逆周期措施」嚟干预按揭市场（如收紧按揭成数，楼按压力测试，加紧检查银行按揭贷款）及不断出口术（如警告有加息风险），但一切徒然，市民就是不听。上星期五陈德霖又试惊人唔知，讲加息缩表与父母为子女提供首期，居然讲到可能会研究为「父母俾首期」状况，向银行提供指引！唔系呀，父母为子女提供首期都要出指引？指引唔慌系鼓励性，一定系向银行施压嘅啫，金管局管得咁细微，不如索性明令禁止不准「买楼靠父干」，青年人买楼一定要纯粹靠自己！金管局系唔系急到药石乱投，最终干预埋父母行为呢？逼年轻人唔钟意政府，金管局要负上政治责任㗎。