2006年MotoGP冠军希顿,踩单车时遇上意外同对头车相撞,深切治疗几日后伤重死亡。讽刺嘅系,佢响赛车场揸电单车高速片弯冇事,反而响意大利海边揸住架单车就炒车玩完。呢个世界永远系,你有晒准备,就算身入险境都可以全身而退;反而环境轻松,你唔为意嘅情况下,每每就系呢啲掉以轻心攞你命。
家阵嘅股市楼市就好似赛车场同意大利海边。楼市个个金睛火眼,日日惊佢爆,政府每日都度桥点样揿住楼价,潜在买家日日刨定报纸,睇吓几时有新盘甚至有笋盘;股市就个个响海边踩住单车,任由腾讯(00700)日日创新高,大市都未识几时停,你今年任何时间沽空都要输。照理论,日日都谂住会爆嘅楼市就好难爆,反而个个睇好嘅股市就危危乎。
大行话要睇淡地产股,话金管局辣招会减慢售楼速度,影响盈利。查实股市几时都唔识准确看待地产股,所以本地地产商股价有资产折让,股票含金量极高。
香港嘅地产商系最幸福嘅一群,玩嘅系近乎独市嘅资本转换游戏,技术含量唔高;只要唔心急,有耐性,保证你赢。到今时今日,政府仲系逼本地地产商发达,想穷都难。太耐历史嘅唔好多讲,就讲今年。今年所有嘅辣招,包括几日前金管局降低按揭成数,都系逼人买一手楼,因为二手唔止供应少,财务支援更少。而家有财力嘅人基本上一早就有楼,未有楼而又想买楼嘅,都系欠缺财力嘅一群。与其成日话释放购买力,倒不如话释放意志力,令唔想或唔敢买楼嘅人,终於意志崩溃,加入负债买楼嘅行列。辣招之后又会令一班人意志坚定一啲,暂时打消买楼念头。一年半载后,见楼市仲升,意志力又会崩溃,到时又扑出嚟买楼,市场又会话释放积压多时嘅购买力。
做庄唔轻易畀个价冧
帮衬发展商财务计划,高杠杆买楼,唔系今时今日,你而家每个礼拜都睇到有蚀让过案,全部唔系二手买番嚟,都系经一手发展商优惠购入,而家顶唔顺要蚀让。今天高杠杆买楼嘅,未来两三年一定有人要蚀让,而家嘅楼市淡友一定讲中,畀佢预测到有人要为借到尽而损手。但系佢哋唔明,点解发展商有咁大嘅资产折让?唔系因为货尾太多,而系赚到嘅钱,派息派得少,睇住股价嚟派,令公司储存嘅流动资金非常充裕。佢哋可以借,可以卖,可以赚,手上嘅银纸只会愈嚟愈多。
结论系,一手发展商同二手业主富户,一齐持货顶住个楼市。你要全港六成冇按揭嘅业主贱价卖楼,又或者叫四成市民仲系辛辛苦苦供紧层楼嘅放弃一生所有,卖楼重头嚟过,恐怕冇人会听你讲。发展商手上嘅货唔忧卖,唔介意借钱畀你买,只要你肯孭条债就得。做庄嘅有咁强实力,唔轻易畀个价冧,因为佢手上不断有货,平卖唔止系卖嗰一间赚少咗,全部货仓嘅货都平晒。
同赛车场一样,楼市系响一个极度操控嘅环境下进行,看似非常危险,但系好少发生致命意外。