限制买地融资

　　大机构主席搵左丁山食午饭，约咗几次，主席都因为有事出差或者有更重要约会而临时取消，主席嘅公关猛咁话对唔住，约完再约。呢啲事冇所谓到极啦，重要公职人物往往有更紧急嘅约会，有时身不由己，左丁山早已见惯，几时有缘便相会，不急在一时。

　　拖拉个零月，呢日卒之唔改期嘞，公关嘅秘书仲好有礼貌，过咗中午十二时就打电话嚟俾温馨提示，好彩啫，原来系约咗十二时四十五分，左丁山就记录错误，以为系一时正。於是提早出门，行到万年大厦，咦？未够钟噃，於是行入adidas旗舰店谋杀五分钟时间，再行返去万年大厦上四楼，果然时间啱啱好，一行入房，主席刚坐低。约会嘅嘢，迟到就冇礼貌，太早到（早於主人家）或会令对方尴尬，最好计准时间，主人家先到，自己跟住入，故此左丁山每次都提早（如因交通挤塞预计不及就冇计，行路就容易控制时间）几分钟到达目的地，再行多两三分钟先至上楼。

　　咦，大公关未到㖭，主席要等佢，好彩呢位主席系大量、不拘小节之人，有啲波士会要求下属等佢，唔系佢等下属㗎，跟老板要识do，早到几分钟迎接老板入房一定冇错，做公关不可一日或忘。公关系呢度熟客，伙计非常醒目，即刻讲：「M小姐到咗嘅嘞，刚刚去咗洗手间啫。」哦，算几识做噃，点知两分钟后，公关总管入到嚟，非常老实咁讲：「真对唔住，我迟咗㖭！」哎吔，即刻笃穿咗伙计讲大话，伙计为之面红红。做侍应，有时为熟客（如M小姐）讲句「白色谎言」（white lie），点都值得农历新年收封利是。主席好关心大湾区发展，惊住大湾区又成为内地与香港嘅地产炒友藉口，乜都未郁，地产先动。有中国人嘅地方，往往如此，乜嘢概念都成为炒地炒楼嘅藉口，大概因为炒地产人人都识，系世界上最易懂得嘅行业。主席又问及金管局限制香港土地融资，有何含义呢？以左丁山愚见，系做吓戏限制内房大款在香港抢地啫，降低土地借贷成数至四成，降低建筑贷款至八成，提高银行对地产商贷款之资本要求，纯是技术性，但本港银行间间有充裕资本比率，本地大发展商个个有大把现金，受到打击嘅只会系中小地产商，所以呢类政策又系明益长江、恒基、新地、信和、会德丰、新世界等等。内房公司有办法安排内地银行开standby L/C到香港做借款保证，根本问题不大。逢有新嘅限制政策，得益者往往系大财团，故此买香港大蓝筹股，往往只会买贵，唔会买错！