土豪买球星

　　国家外汇管理局严限内地居民每年购汇五万美元，不得在境外用作买人寿保险、置业、炒股等等。限购数目虽小，政策大方向就好明显：严打走资。

　　话就系咁话，但事情好矛盾。在马场沙圈碰到一位银行家，佢话香港银行不会做按A股借人民币或港纸嘅生意，因风险太大，近大半年亦无兴趣倾内地公司境外投资项目，因内地已百分之一百揸紧审批境外投资，普遍方法系冇明令不准，但要求批准嘅文件一递上去审批当局，有关人等就似足半罢工状态，一於唔理，有关文件一入侯门深似海，查询一概无回应。

　　既然咁怕走资、严打走资，左丁山就非常唔明白，点解上海球会买外国球星，买得咁爽手呢？话出一亿美元年薪收买C朗噃，C朗在皇马正值黄金岁月期，唔肯应承之吗。但车路士嘅巴西球星（未算世界级）奥斯卡近三个月长居后备席，上海上港集团足球俱乐部就以6000万美元转会费收购之，私人周薪40万英镑，比C朗、美斯还要高薪。上海申花又癫咗，用1100万美元收购过气阿根廷球星泰维斯，俾周薪61.5万英镑，直情离晒谱，奥斯卡还算当打，泰维斯年逾30，在欧洲已无法立足，上海申花以天价人工请佢，所谓何事？

　　车路士教练干地（Conte）曾系意大利球星，意大利国脚，祖云达斯及意大利国家队教练，见过世面，经验丰富到极，卖走大后备奥斯卡，收回6000万英镑，赚到笑之余，亦忍唔住讲一句话，讽刺中国。就系You have to respect money！言下之意，当银纸唔系钱，系要小心后果嘅。现在中超已成为世界二綫球星、过气一级球星嘅最后搵银天堂，临收山前到中国赚番一大笔，系中国土豪球会老板先至有咁慷慨。但要知道，踢足球系11个人合作嘅，不能单单依靠一个身上铺黄金嘅球员，其他相对低薪中国球员会点谂？会唔会为泰维斯铺桥搭路，为佢抢波喂波？怕好难咯！中国国家外汇管理局唔知有冇严格审批呢啲球会嘅外汇使用额度呢？中超再系咁大花筒，以后盲抢法比加斯、朗尼、耶耶托尼、大衞施华呢类30岁左近球星，外管局要唔要严查至得？不过外国球员唔驶笑得太高兴，以前杜奥巴加入上海申花搞到冇粮出，不欢而散呀！