餐饮M以前在史丹顿街开地铺卖西班牙酒、醋及食物，后来因为加租，索性搬咗去柴湾工业大厦，租金大减，现在专做批发及直销畀食肆，工作时间冇咁长㖭。呢日佢从工厦出嚟，竟然碰到一对欧洲人带住黑超周围望，柴湾比较少见外国人，於是望多两眼，原来系彼此认识多年嘅室内设计师B。B君专做餐厅装修设计，二十年来写字楼一直系在黄竹坑，点解会在柴湾街头出现？设计B讲：「黄竹坑嗰边租金贵，加完又加，我逼於无奈，搬嚟柴湾，每个月悭番好多。」B君新写字楼亦在工厦，与餐饮M相距不远，因商厦租金不断上升，港岛大趋势系由中上环搬去东区，最远去到柴湾。
律师W话大律师行如孖士打，Freshfields呢啲响当当名字都搬去鰂鱼涌，投资银行领袖高盛亦自中环中心退租，搬去鰂鱼涌租五层做后勤总部，以后鰂鱼涌太古坊一带将有不少高薪外国人士出现，带旺西式食店。现在中环甲级商厦尺租动辄一百元以上，鰂鱼涌就收尺租六七十元，折让价好吸引。
记得个几星期前与一位外资租务代理行高层B倾起，佢话由於政府要保育中环街市及前政府合署西翼，浪费黄金商业用地，中环大地主暗中偷笑，明知中环在未来都无可能有甲级商厦（起码一百万平方尺，一流管理之智慧型新式商厦）出现，故此放胆加租，搞到孖士打、高盛等都要迁移，好快就有人跟住走，例如一向在万宜大厦嘅DBS唯高达证券迟啲又会搬去太古坊。
唔去太古坊嘅话，就搬去九龙东，在沙田新城市第四期占地几万尺之JP摩根大通后勤基地，就是如此，总
之就系「水去低流」，租金平系吸引力大啲嘅。但系租金贵嘅地方，边个承租呀？高层B话：「唔驶惊，好多内地民企，特别系上市公司，已成为一股新兴势力，唔怕租金贵，有机会就进驻中环甲级商厦，要威一威！」原来如此，唔怪得在中环见到不少OL，打扮举止，似足香港人，但一开口就讲纯正普通话，相信就系内地企业嘅职员，迟早普通话会取代英语成为中环最流行「官话」。有一位内地生参加新亚校友会，广东话好纯正，佢唔讲，唔知佢来自北方，佢话：「有不少同学留港工作，识讲广东话好方便，此则要多谢中文大学要我地必修粤语咯，四年下来，点都学晓广东话啦，我在科大港大嘅大陆朋友到现在仍然未识广东话，佢地话在香港生活都几唔方便！」
App下载
