呢排，社会上好多关於野猪嘅争詏，引入天敌、杀与唔杀、送去海岛、又或者引刀成一快，将猪阉鬼嗮。香港咁派系化，唔使讲又系两派人开始对垒，不过引刀两边都唔系，试试讲下啲农务系嘅个人睇法。
由於长期蛰伏喺大湾区，香港新闻不一定日日睇，打开Yahoo一搜，真系吓一跳，铜锣湾都有野猪行街，咁就真系大问题，我唔系话怕野猪侵略人嘅地盘，而系恐怕香港嘅自然环境，已经暗暗被严重破坏。
野猪系杂食动物，千祁咪以为佢地净系食番薯，就我所知，佢地好中意食蛇，而且对部分蛇毒可能免疫，以前我喺大陆某山做嘢，要同山佬打交道，佢地话我知，野猪肚（野猪胃）好值钱，而且食过五步蛇（即系蕲蛇）嘅最值钱，当野猪见到五步蛇，就会成条吞，蛇未死之前，会垂死反扑，用毒牙咬野猪嘅胃，留底印记，佢地打到野猪，个猪肚系睇牙印估价嘅，不过，我唔记得食咗补边样。有野猪嘅地方，恐怕蛇同龟首先遭殃，野猪唔会因为有人喂就唔食天然嘅嘢，番薯萝卜又点比得上蛇羹。
铜锣湾大坑行街嘅野猪，估都估到边度落街嘅喇，应该系礼贤会隔离条山坡楼梯行落嚟嘅，以前细个久唔久就行呢条楼梯上励德邨、新法、胡文虎，听闻有同学喺果度见过water monitor，当然，啲友仔可能见到大条嘅马鬃蛇一嘢腾鸡睇错喇，再上去怡景道，以前有人收潲水养猪，虽然已经停养多年，恐怕野猪聚集仍不无关系。
讲吓天敌，其实南中国嘅野猪天敌，除咗虎豹之外，仲有一种，而且香港一直都有，就系大南蛇，缅甸蟒。按道理，野猪咁多，即系猪仔都多喇，蟒蛇应该同样肥仔，百子千孙，细蟒蛇就食青蛙、老鼠，大咗就唔该生生性性，帮手食多D野猪喇。
不过，南蛇食野猪，唔系十分得食，因为猪仔有大猪保护，香港大只嘅野猪，恐怕要中南美洲嘅森蚺先搞得佢掂。另一方面，香港野猪大多群体行动，蛇咬住一只，其他猪会攻击蛇。地战再有效，都不能抵挡两个或以上嘅敌人。
送去孤岛？先唔讲野猪识游水，就系一个孤岛忽然多咗几十以至几百只野猪，整个岛上生态马上大浩劫，而且你仲要好似以前大鸦洲养住啲越南船民咁，日日送饭过去，否则食光个岛之后，野猪就会食同类嘅尸体，到时一定成为国际新闻。
野猪泛滥，多多少少都同楼价扯上关系，咁都得？系呀，真㗎。楼价越来越贵，香港人住嘅屋越来越细，莫讲养猫狗，就算养缸鱼都要谂过度过，好多屋宛仲唔俾养猫狗，咁佢地寄情喂饲流浪动物、野生动物，一啲都唔奇怪，尤其是当一只野生动物对人产生信任，同你交流，果种感觉真系妙不可言，个人睇法，所谓灵性，就系人类所未能掌握嘅互动，呢样嘢完全凌驾於物种分歧，甚至系因为跨物种而放大。一旦产生，无数可以言传及不能言喻嘅感觉满溢於胸怀。
另一个原因，可能同宗教有关。香港每个礼拜咁多人去放生，有收钱组团有自发，个个善信莫非系求家人平安，自己发达之类，咁放生同救济，都系差唔多啫，部分人喂流浪猫仔狗仔，部分人可能就选择救济D野猪。按道理，救啲野生嘢系应该功德大啲，因为人工养殖嘅动物，本来投胎今世就系要受一刀，而野生动物日日吸埋吸埋啲天地灵气日月精华，报恩都够力啲啲喇，系咪？
所以，靠严管喂饲去减少野猪数量，基本上唔会有几多成效，你喺呢个黑点装cam，佢转去第度话都冇咁易，只要系有人心念山上几只猪仔肚子饿，就会有人谂计突破监控，又唔系伤天害理，完全唔会有道德约束。
既然已经有大量市民对野猪产生感情，咁就应该顺应民意，将果啲有名有姓嘅宝贝猪猪，由善信及动保人士带路，用麻醉枪全部捕捉，检疫绝育之后，揾个地方养起佢，俾人继续喂，饲料都悭返，其他冇人识得嘅咖哩啡，就要适当地捕捉，最好打咗之后全部俾长者进补，由深水埗明哥主理，搞个一年一度或半年一度嘅耆英山猪节，老人家一定食得好开心，而最重要系动物身体冇被浪费，合乎对待野生动物嘅道德操守。
App下载
