退休人士变家厨

　　定期饭局常客之一，老友S，自有新冠肺炎以来已成为稀客，一年多以来，饭局不时受限聚令影响而暂停，但即使恢复四人一枱之后，老友S都好少参加，理由非常简单，就系退休人士，小心补养为上，健康第一，便尽量减少出街，更绝少与朋友吃饭，年多以来，训练自己成为家庭厨师，为妻女煮饭。十几个月冇见佢，左丁山唔抵得，卒之要单对单约佢食饭，佢肯应承噃，但要左丁山到佢屋企食便饭，唔肯移玉步到酒店。

　　请朋友回家吃饭，并非香港常态，最主要理由系香港人居住单位嘅平均面积可能系全亚洲最细，与欧美更加冇得比，请客回家又要花时间煮饭烧菜与清洗碗碟，不如大家到餐厅啦。老友S话要到佢屋企食饭，令左丁山回忆起，上一次到朋友家吃饭系边一年边一个月呢？都唔记得清楚咯，应该系新亚书院师兄张总未退休去上海定居之前，邀请几位校友到Century Tower半山圆形豪宅大厦，吃他入厨炮制嘅拿手菜式，张总系美食专家，唔只识得食，仲系超一流家厨，张太从来唔会在家入厨，只系负责洗碗碟，系一件好辛苦嘅工作嚟嘅，因为张总在家宴客，十足高端餐厅格局，不停更换碗碟，太太睇见就对左丁山讲：「难为了阿嫂！」点解冇工人洗？享受美食赞叹张总厨艺之余，了解到张总收藏了不少珍贵印章摆放在家供朋友欣赏，又惊外佣不小心，故此不请家佣。既然如此，张总每次请朋友回家吃饭，要问过太太肯唔肯洗碗先！

　　张总当年有银行租屋在Century Tower畀佢住，气派自是不同。此日来到老友S住宅单位，系标准香港高级中产格局，建筑面积千四尺，时值四千几五千万，装修一流，原来老友S嘅二千金系室内设计师，唔怪得间隔系十分讲究，如果计埋住宅时价，香港嘅亿元富翁应该数以万计，但现实啲讲，如果只系得一层楼自住，即使供完按揭，仍然只系有stock（存货），冇现金流（cashflow），好睇唔好食，住宅价值锁死咗吖吗！故此美国新英伦地区的有屋人士退休之后就卖屋，搬去南部过退休生活，加州退休人士会考虑卖屋搬去阿里桑拿，原因就系先卖洛杉矶住宅，再到Tucson买大屋之后，还有可观现金供退休之用。可惜吖，香港人依家愿唔愿意卖咗天后庙道住宅，搬去中山，珠海呢？相信更多中产系似刘细良卖楼变现移民加拿大，孰令致之？