一,点解会有两条友响铁达尼号上面争女?因为佢哋唔知条船撞紧山呀。嗱,正路来讲,假如你知条船撞紧山,你又改变唔到航道,你会点?自助餐食饱啲,搵定逃生路线,甚至乎一早去定 deck 面搵定救生艇。争女,傻的吗?
二,Donald Trump 话其实自己可以唔需要同老习开拖,不过上帝叫做,冇法子啦。事实系,美国呢一转资产泡沫周期,已经有出现调整嘅迹象。Trump 好清楚,而点解佢拣呢个时间出手?我点知喎。
三,之前我都有提过,inverted yield curve 呢个超自然现象,可以简单理解成资金买到冇野好买,少少 yield 嘅长债都照杀。不过,点解大家都集体地认为其他嘢买唔过呢?大家眼中,世界资产市场就只有一条超级大水喉就系 The Fed;以前就话 Don’t fight the Fed,依家直头系一早要投靠 The Fed。公开市场运作,系联储局透过买入国债放水出街,又或者借钱畀商业银行去买国债;德国国债实质负利率嘅状况,有可能会出现响美国。
四,话虽如此,强硬对华政策,唔应该理解成 Trump 嘅个人 agenda。两党共识系中国唔守信,亦都讲咗好几年。Trump 越话自己系老习好朋友,其实潜台词系叫老习畀佢攞个彩好过益共和民主两党班人。
五,至於大陆,数据嘅嘢,信则有不信则无。首先,人民币跌出口会唔会更有竞争力?平,点都会买多咗,但唔代表赚多咗。最简单嘅宏观经济学都有教,贬值嘅结果有两个,出口平咗,入口贵咗。中国经济嘅不方便真相系,食品能源等唔少都要靠入口。有唔少道听途说嘅消息话,大陆近来进口货价钱升唔少,甚至影响到成条供应链都加晒价。
六,八十年代中国最大嘅经济民生事件系乜?其中之一系闯物价关,但实情系半自由半开放嘅市场,促成黑市活动同贪腐。中共好避忌呢段历史,但始终要面对现实:当市场效率同生产力嘅增长配合唔到货币信贷嘅总额,结果就系通胀。
七,历史上,货币信贷急速增,通常都系因为军费(皇室点大花筒一日都系得廿四个钟享乐,用得几多吖)。现代欧美各国,就多一样叫 entitlement,不过伟大嘅人民共和国,又有乜 entitlement 吖。军费,通常对市场效率系完全冇任何脾益。所以,每个政权最后都系出现不受控嘅通胀,古今中外都系咁。但通胀系 symptom of the disease 而唔系 disease 本身。即系一个有长期病嘅人,通常死於并发症。
八,「咁几时支爆呀?讲咁耐。」我又点知呀?正所谓 a broken clock is right twice a day,一直买围骰,梗有一铺中。不如真搵病因啦。目前中国面对两个最严重嘅结构性问题:一,人口结构;一孩政策真系旷古烁今嘅超错政策,中国未堀起就老化。二,市场结构;政府指令经济仍然存在,冇推陈出新冇代谢,整体效率极低。
九,人口结构,基本上无得救。讲完。
十,经济结构,唔系无得救,但呢个手术涉及到一个核心问题:党指挥军政之余,亦都系成个国家经济结构入面有利益,由四大银行、国级央企等,到地方经济同企业。情况比洋务运动时成立嘅乜局乜局,问题更大。贪腐系因为制度入面大多诱因,圣人去 run 都好难唔贪。
十一,国企上市,唔代表佢哋有根本嘅改变,只不过佢哋多咗一个集资嘅渠道。另外,近年好多距离中央水喉太远但又有地方势力嘅企业,咪借香港融资,上市又好发债又好。卖股票同借钱,本来冇乜问题,不过当你 book 嘅收入同利润系人民币,但借嘅系美金,人民币贬一成就等於即时畀人起十厘钉,都咪话唔金。所以我经常提醒读者,人民跌香港好难唔仆直,系仆到直一直,惨过 1997。
十二,结果,中央唯一嘅救市方法,咪又系货币信贷量宽。大家知唔知点解大陆有外汇管制?假如畀十四亿人可以上 Facebook,你估佢哋会唔会净系上微讯?同理,有得拣,佢哋又点会只系持有人仔?外汇管制,变相就系迫大陆人持有人民币,用人民币买返自己嘅股票;贸易保护主义,就系迫大陆人同返微讯小米华为。
十三,「喜茶微讯小米华为,都几好吖!」你可能会话。甚至你都有用埋一份。但重点系有冇得拣。现实系,你见到几多大陆人想去外面?其实,由晚清到家阵,可以去外面消费同投资嘅,永远都系幸运嘅特权阶级。我成日话呢个国家个几世纪都不思长进,真系好 sad。
十四,从文化层面上,由於经济结构嘅需要,大陆永远都有一股反外嘅情绪,好深层次咁 justify 封疆锁国嘅现实。呢个现象唔一定系国家主导,有时候一般人见到自己嘅处境,好易会选择一个简单嘅方法去 reconcile 去 make sense of the experience。矛盾同差距,最终变成仇恨,真正嘅集体因爱成恨。上世纪,有义和拳;近年都有唔少愤青。英美澳加撑香港集会踩场班小粉红,亦应作如是观。
十五,林郑响呢个时候,搞单咁杰挞挞嘅,令共和民主两党都有人话要检讨香港政策法,但老习都要死撑,我估啦,系因为如果佢一缩,唔知到其他仍然在生嘅精神领袖,会点样乘机发围。中共无错系极权,但世上无真正嘅独裁政府,尤其系十四亿人嘅国度,一定有一个权力利益纠缠嘅共生体。对呢班人来讲,内部权力平衡,来自共同利益。一旦共同利益受损,就会出现分裂排斥。
十六,中南海班人,内斗内行,外斗外行。林郑今次累到大老板,假如大老板觉得佢只系废,就点都要撑,但都要搵定 plan B。不过,尔虞我诈嘅宫廷政治入面,系咪真系等到你有 plan B 呢?我唔知,都系估下。
十七,理论上美国九月都会过民主人权法案,好快就会有人讲美港关系法。同埋,直觉经济真系差咗好多。正如一开始咁讲,争女呢,thanks but no thanks la,我都系食埋个自助餐,然后上 deck 面吹下海风,睇下星⋯⋯