做咗功课未，做紧啦

　　我读小学时，阿妈经常被班主任召见，理由只有一个，就是我冇功课交，班主任问阿妈点解我冇功课交，阿妈话唔知，因为每晚都问我做咗功课未，我每次都话做紧啦，但原来我只是空回报，不过我又唔知点解，我每次话做紧啦，阿妈都会相信，阿妈唔知道，做紧啦即是未做。

　　有很多人唔明白，JPEX虚币案件，点解会有2000人落叠，涉及金额超过14亿元，有消息话只是冰山一角，代表受害人更多，金额更大，最奇怪JPEX是无牌，点解无牌都可以做咁大生意，甚至可以卖广告。

　　我认为现在受到损失的人基本上是一个好父母，每一次问子女做咗功课未，只要子女回答做紧啦，父母便不会深究，直至学校要见家长，老师问父母点解他们的子女唔交功课，到那时候父母才如梦初醒，原来做紧啦即是未做，现在受到损失的人最初投资JPEX的时候，都会问公司有冇牌，答案千篇一律话申请中，很多人会认为申请中代表即将有牌，所以放胆投资虚币。

　　我阿妈亦不是蠢人，我话做紧功课，到最后都唔知有冇做，於是问班主任我有冇交功课，佢竟然唔肯讲，后来又因为我冇交功课而要见家长，当时我怀疑班主任唔知系咪想见我阿妈。

　　证监处亦好似我阿妈一样，当有人问JPEX有冇申请牌照，就会话是商业秘密，令有怀疑的人认为JPEX正在申请牌照，於是放心买虚币，结果输到一仆一碌，几经艰苦，证监处抵受不住外边压力，唯有公开正在申请虚币牌照的公司，原来只得4间，虽然证监处已经9次话JPEX冇牌，但并不代表JPEX不是申请中，如果证监处一早话JPEX并没有申请，我相信最少减少一半人落叠，证监处成日话自己冇权，唔通连讲一间公司有冇申请牌照的权力都冇，唔会有人相信。